მარტინ დემიჩელისი ბუნდესლიგის კლუბს გაწვრთნის

ლაიფციგმა ახალი მთავარი მწვრთნელის პოსტზე 45 წლის არგენტინელი სპეციალისტი მარტინ დემიჩელისი დანიშნა.

„წითელი ხარების“ ახალმა დამრიგებელმა კლუბთან კონტრაქტი 2028 წლის 30 ივნისამდე გააფორმა. მისი ბოლო სამუშაო ადგილი მალიორკა იყო, რომელიც ლა ლიგიდან გავარდა.

მარტინ დემიკელისმა სამწვრთნელო კარიერა მალაგაში ასისტენტად დაიწყო, შემდეგ კი მიუნხენის ბაიერნის სხვადასხვა ასაკობრივ გუნდებში იმუშავა.

2022/23 წლების სეზონში ის სამშობლოში დაბრუნდა და თავისი ბავშვობის კლუბის, რივერ პლეიტის მთავარი მწვრთნელი გახდა.

პროფესიონალური გუნდის ხელმძღვანელად პირველივე სეზონში დემიჩელისმა ბუენოს-აირესული კლუბი არგენტინის ჩემპიონობამდე და ორ თასის ტიტულამდე მიიყვანა.

2 წარმატებული წლისა და 87 ოფიციალური მატჩის შემდეგ, მისი კარიერა მექსიკაში გაგრძელდა.

ყოფილმა მცველმა 2024/25 წლების სეზონში 5-გზის ჩემპიონი მონტერეი ჩაიბარა და 43 მატჩში, სხვა წარმატებებთან ერთად, მექსიკის ჩემპიონატის ფინალშიც გაიყვანა გუნდი.

ევროპაში მთავარი მწვრთნელის რანგში დემიკელისმა პირველად თავი მალიორკაში გამოიჩინა, როდესაც მისმა გუნდმა მადრიდის რეალი დაამარცხა.

მან სეზონის მიწურულს ჩაიბარა ბალეარის კუნძულების კლუბი, რომელიც გავარდნის ზონაში იმყოფებოდა. მიუხედავად 5 გამარჯვებისა, 8-მატჩიანი წაუგებელი სერიისა და ძლიერი თამაშებისა სხვა წამყვანი გუნდების წინააღმდეგ, არგენტინელმა სპეციალისტმა მალიორკასთვის ლა ლიგაში ადგილის შენარჩუნება ვერ მოახერხა.

ყოფილმა მცველმა თავისი სათამაშო კარიერის უდიდესი ნაწილი მიუნხენის ბაიერნში გაატარა.

რივერ პლეიტში პროფესიონალურ ფეხბურთში დამკვიდრებისა და არგენტინის ჩემპიონატის 4-ჯერ მოგების შემდეგ, დემიკელისი 2003 წელს გერმანიაში გადავიდა.

2010 წლის ბოლომდე მან ბაიერნის მაისურით საერთო ჯამში 259 მატჩი ჩაატარა და 4-ჯერ მოიგო როგორც ბუნდესლიგა, ასევე გერმანიის თასი.

2014 წელს დემიჩელისმა მანჩესტერ სიტისთან ერთად ინგლისის პრემიერ ლიგის ტიტული მოიპოვა. ესპანეთში კი ის მალაგას, ესპანიოლისა და მადრიდის ატლეტიკოს ღირსებას იცავდა.

არგენტინის ეროვნული ნაკრების შემადგენლობაში დემიკელისმა 51 მატჩი ჩაატარა და 2 გოლი გაიტანა.

2014 წელს დემიჩელისი მსოფლიოს ვიცე-ჩემპიონიც გახდა, ბრაზილიაში გამართული მსოფლიო ჩემპიონატის ფინალში გერმანიის წინააღმდეგ მან სრული 90 წუთი ითამაშა.