სკანთორპ იუნაიტედის 23 წლის ინგლისელმა ფეხბურთელმა, ჯონათან ჯოშემ პირველად ილაპარაკა იმ საშინელ თავდასხმაზე, რომლის დროსაც მატარებელში 7-ჯერ დაჭრეს.
ის ერთ-ერთი იყო იმ 11 მგზავრიდან, რომლებსაც გასული წლის ნოემბერში, კემბრიჯშირში, შეიარაღებული მამაკაცი თავს დაესხა.
„მატარებელში მშვიდად ვიჯექი, როცა ვიღაც ზურგიდან მომეპარა და მხარში დანა ჩამარტყა. მაგიდებსა და სკამებს გადავახტი და ვაგონებს შორის სირბილი დავიწყე. ხალხს ვუყვიროდი, გაიქეცით, კაცია დანით-მეთქი“, - იხსენებს ჯოშე ბიბისისთან ინტერვიუში.
მცველმა, რომელიც თავის დროზე ლიდს იუნაიტედის 21-წლამდელთა გუნდშიც თამაშობდა, ვაგონში განგაშის ღილაკს მიაჭირა. თუმცა, რადგან შემთხვევა ჰელოუინის მეორე დღეს მოხდა, მგზავრების ნაწილმა მისი სისხლიანი მაისური და ყვირილი თავიდან ხუმრობა გონია. საავადმყოფოში გაირკვა, რომ ფეხბურთელს ბიცეფსზე, მხარსა და მკლავზე 7 ჭრილობა ჰქონდა მიყენებული.
თავდამსხმელი, ანტონი ვილიამსი, მაშინვე დააკავეს და მას 10 ადამიანის მკვლელობის მცდელობის მუხლით ასამართლებენ. ჯოშე ამბობს, რომ მას შემდეგ მატარებელში აღარ ასულა, რადგან ხალხის მიმართ ნდობა სრულად დაკარგა.
