მსოფლიო ფეხბურთს უმძიმესი ტრაგედია დაატყდა თავს.
უგანდის ეროვნული ნაკრებისა და SC Villa-ს 27 წლის კაპიტანი, დევიდ ოვორი, დედაქალაქ კამპალას ქუჩაში ყაჩაღებმა სასიკვდილოდ სცემეს. ბოროტმოქმედები ფეხბურთელს საღამოს 8 საათზე, სახლისკენ მიმავალ გზაზე დაესხნენ თავს, ძარცვის მიზნით ქვებით სასტიკად გაუსწორდნენ და მიიმალნენ. საავადმყოფოში გადაყვანის მიუხედავად, მისი გადარჩენა ვეღარ მოხერხდა.
ოვორი ქვეყნის ნამდვილი ლიდერი და ახალგაზრდებისთვის უდიდესი შთაგონების წყარო იყო. მას ევროპაშიც უთამაშია, კერძოდ ესპანურ ველესსა და შვედურ უტსიკტენსში. 2023 წელს მშობლიურ SC Villa-ში დაბრუნების შემდეგ კი გუნდს ისტორიული, მე-17 საჩემპიონო ტიტულის მოგებაში დაეხმარა.
აღსანიშნავია, რომ უგანდაში კრიმინალმა კატასტროფულად იმატა და ცნობილი სპორტსმენები ხშირად ხდებიან თავდასხმის სამიზნე. სულ რაღაც რამდენიმე კვირის წინ, ზუსტად იმავე სცენარით, ბანდამ ქუჩაში ეროვნული სარაგბო ნაკრების 27 წლის მოთამაშე, სიდნი გონგოდიოც მოკლა.
