მატეტას კრისტალ პალასის დატოვება ამ თვეშივე სურს

ფრანგი თავდამსხმელი ჟან-ფილიპ მატეტა კრისტალ პალასთან კონტრაქტის გახანგრძლივებას არ აპირებს.

ბენ ჯეიკობსის ინფორმაციით, საფრანგეთის ნაკრების 28 წლის ფორვარდმა ლონდონურ კლუბს აცნობა, რომ მიმდინარე ზამთარში გუნდის დატოვება სურს და შესაბამისად, არ გეგმავს კონტრაქტის გახანგრძლივებას, რომელიც 2027 წლის ზაფხულამდეა ძალაში.

მატეტას იუვენტუსში გადასვლა სურდა, თუმცა იტალიურმა კლუბმა იჯარის ვარიანტი შესთავაზა შემდგომი გამოსყიდვის უფლებით, რომელიც მხოლოდ გარკვეული პირობების შესრულების შემთხვევაში გახდებოდა სავალდებულო. ეს პირობები კი კრისტალ პალასისთვის მიუღებელი აღმოჩნდა.

ამ ეტაპზე ფრანგი ფეხბურთელის მიმართ ინტერესს ასტონ ვილა იჩენს, რომელიც ასევე აკვირდება ტემი აბრაჰამის სიტუაციას. კრისტალ პალასი მატეტას სანაცვლოდ დაახლოებით 40 მილიონ ფუნტს ითხოვს.

მიმდინარე სეზონში ჟან-ფილიპ მატეტამ პრემიერ ლიგის 22 მატჩში 8 გოლი გაიტანა.