კილიან მბაპემ რეალ მადრიდის ბოლო გამარჯვებები მანჩესტერ სიტისა და ელჩეს წინააღმდეგ გამოტოვა, თუმცა გუნდის თამაშის ხარისხი იმედს იძლევა, რომ ფრანგი ვარსკვლავის დაბრუნების შემდეგ სამეფო კლუბი კიდევ უფრო მაღალ სიჩქარეებს განავითარებს.
მბაპე რამდენიმე კვირაა მუხლის ტრავმის გამო ლაზარეთშია. ალვარო არბელოა და მისი სამწვრთნელო შტაბი თავიდანვე იმედოვნებდნენ, რომ ფორვარდი მანჩესტერ სიტისთან საპასუხო შეხვედრისთვის მზად იქნებოდა. იმის გათვალისწინებით, რომ მადრიდელებს პირველი მატჩიდან 3-ბურთიანი უპირატესობა აქვთ (3:0), გუნდის ლიდერის ნაჩქარევად დაბრუნების აუცილებლობა არ არსებობს, თუმცა თავად ფეხბურთელი მოედანზე გასვლას მოუთმენლად ელის.
მდგომარეობა ამ დროისთვის
როგორც გამოცემა Diario AS იუწყება, მბაპეს რეაბილიტაციის პროცესი გეგმაზე უკეთ მიმდინარეობს. მუხლზე დისკომფორტი პრაქტიკულად გაქრა, რაც იმას ნიშნავს, რომ ოპერაციაზე უარის თქმა და კონსერვატიული მკურნალობის არჩევა მართებული გადაწყვეტილება იყო. აღსანიშნავია, რომ ქირურგიული ჩარევა არცერთ ეტაპზე არ განიხილებოდა და ამ გადაწყვეტილებაზე გავლენა არც მოახლოებულ მსოფლიო ჩემპიონატს მოუხდენია.
ბოლო ორი დღის განმავლობაში მბაპემ მანჩესტერ სიტის წინააღმდეგ თამაშის დიდი სურვილი გამოთქვა. მისი მდგომარეობიდან გამომდინარე, ეს სცენარი სრულად რეალურია. მუხლის მდგომარეობა ბოლო სამ კვირაში მკვეთრად გაუმჯობესდა და მიუხედავად იმისა, რომ კილიანი სასტარტო შემადგენლობისთვის ჯერ მზად არ არის, მოსალოდნელია, რომ ის განაცხადში მოხვდება და თამაშს სათადარიგო სკამიდან დაიწყებს.
ტრავმა საბოლოოდ ჯერ კიდევ არ არის მოშუშებული, თუმცა არ გამორიცხავენ, რომ მბაპემ ინგლისში რამდენიმე წუთი მაინც ითამაშოს. საბოლოო სიტყვა, რა თქმა უნდა, ალვარო არბელოაზე იქნება.
