მძიმე ტრავმა - რამდენი ხანი ვერ ითამაშებს ისაკი?

ლივერპული შიშობს, რომ ალექსანდერ ისაკმა ტოტენჰემთან 2:1 მოგებული მატჩის დროს, სავარაუდოდ, ფეხი მოიტეხა.

26 წლის ფეხბურთელი, რომელმაც შესვენებაზე კონორ ბრედლი შეცვალა, ტრავმა გოლის გატანის მომენტში მიიღო, როცა ფლორიან ვირცის გადაცემის შემდეგ ანგარიში გახსნა.

დარტყმის შემდეგ ისაკი უხერხულად დაეცა, რადგან ტოტენჰემის მცველმა მიკი ვან დე ვენმა ვარდნით სცადა მისი შეჩერება, შვედმა კი ვეღარ შეძლო თანაგუნდელებთან ერთად გოლის აღნიშვნა.

ისაკს სამედიცინო დახმარება მაშინვე გაუწიეს და მოედანი ლივერპულის სამედიცინო შტაბის წევრების დახმარებით დატოვა, მის ნაცვლად კი ჯერემი ფრიმპონგი ჩაერთო თამაშში.

ლივერპული შეშფოთებულია თავდამსხმელის ფეხზე მიღებული დაზიანების სიმძიმით. ტრავმის ზუსტი ხარისხი ჯერ დადგენილი არ არის, თუმცა მსგავს შემთხვევებში, როგორც წესი, რამდენიმეთვიანი იძულებითი პაუზა არის საჭირო.