"მერაბის გამარჯვებაში დარწმუნებული ვარ" - რომან დოლიძე სამომავლო გეგმებსა და მერაბის ბრძოლაზე

UFC 320-ის წინ რომან დოლიძემ თავის სამომავლო გეგმებსა და მერაბ დვალიშვილის სატიტულო ბრძოლასთან დაკავშირებით ჩვენთან კომენტარი გააკეთა.

"პირველ რიგში მინდა ყველას მივესალმო, ძალიან დიდი მადლობა მინდა გადავუხადო ყველას გულშემატკივრობისთვის. თავსაც ძალიან კარგად ვგრძნობ, ბათუმში ვაგრძელებ ვარჯიშებს, ფიზიკურ ფორმას ვინარჩუნებ. რაღაც შემოთავაზებები, როგორც ყოველთვის მაქვს, მაგრამ ჯერ არ ვჩქარობ.

რა თქმა უნდა, ბრძოლა ისე არ ჩატარდა, როგორც გვინდოდა, მაგრამ მე ასეთი რაღაცები არასდროს მაჩერებს. მე როგორც პიროვნებას ეს არასდროს მცვლის და ვერ შემცვლის. აღდგენა მოვახერხე, როგორც საჭირო იყო და ჩვეულ რითმში გავაგრძელე ფიზიკური მომზადება და ფორმის შენარჩუნება. სულ რაღაცებს მთავაზობს ორგანიზაცია და მინდა, რომ ამისთვის მზად ვიყო.

გეგმები მაქვს, რა თქმა უნდა. დიდი ალბათობით, მოსამზადებელ დარბაზსა და ადგილსაც შევიცვლი. არანაირი პრეტენზია მწვრთნელებთან არ გამაჩნია. რა თქმა უნდა, თუ ვეგასში იქნება ბრძოლები, იგივე დარბაზში ჩავალ და ვივარჯიშებ, მაგრამ ერთადერთი ის ნიუანსია, რომ მინდა ცოტა უფრო ახლოს ვივარჯიშო იმიტომ, რომ იმ პერიოდებში, როცა ბრძოლები არ მაქვს, მინდა, რომ მქონდეს ახლოს კარგად და ხარისხიანად ვარჯიშის შესაძლებლობა.

მერაბის ბრძოლაც მოგვიახლოვდა. როგორც ყოველთვის, მე მის გვერდზე ვიყავი და ძალიან სამწუხაროა, რომ ამჯერად ვერ მოვახერხებ, სამუშაო ვიზა მაქვს მისაღები. რამდენიმე წლით გვაძლევენ სამუშაო ვიზას, არანაირი პრობლემა არ არის მიღების დროს, ძალიან ადვილად მაძლევენ, უბრალოდ როცა 2 წლის შემდეგ ვადა ეწურება, შემდეგ ბრძოლა უნდა მიიღო, რომ ამის ხარჯზე ნებართვა მიიღო ახალი ვიზის.

ამიტომ, სამწუხაროდ, მერაბის გვერდზე ვერ ვიქნები, მაგრამ, როგორც ყოველთვის, დარწმუნებული ვარ მის გამარჯვებაში. მის ოპონენტსაც ვიცნობ, ძალიან კარგი პიროვნებაა, მაგრამ, ვფიქრობ, რომ მერაბი ამ ბრძოლას მოიგებს."

მერაბ დვალიშვილისა და კორი სენდჰეგენის ბრძოლა 5 ოქტომბერს გაიმართება. UFC 320-ის მეინ ქარდი 06:00 საათზე დაიწყება.

დვალიშვილი: "არავის შეუძლია ჩემთვის პრობლემების შექმნა"