მესი, ლუის ადრიანო, ჰალანდი - ყველაზე მეტი გოლი ჩემპიონთა ლიგის ერთ მატჩში

9 სთ წინ · 0 წთ წასაკითხად

ფონტის ზომა

სამ მოთამაშეს უეფას ჩემპიონთა ლიგის ერთ მატჩში ხუთი გოლი გაუტანია, ენტონი გორდონი კი გახდა მე-18 ფეხბურთელი, რომელმაც ერთ შეხვედრაში ოთხი გოლის გატანა შეძლო.

VIDEO: გორდონის პოკერი და განადგურებული ყარაბაღი — ნიუკასლმა მეორე მატჩი ფორმალობად აქცია

ერლინგ ჰალანდი 2023 წლის მარტში ჩემპიონთა ლიგის ექსკლუზიურ კლუბს შეუერთდა და ერთ მატჩში ხუთი გოლის გატანით, ლიონელ მესისა და ლუის ადრიანოს შედეგი გაიმეორა.

მესი ასევე იმ 18 ფეხბურთელს შორისაა, რომლებმაც ჩემპიონთა ლიგის ეპოქაში ერთ მატჩში ოთხი გოლი გაიტანეს, ამ სიაში არიან კრიშტიანუ რონალდუ, კილიან მბაპე და რობერტ ლევანდოვსკიც, ხოლო 2025/26 წლების პლეი-ოფის პირველი მატჩის შემდეგ მათ ნიუკასლის ვინგერი ენტონი გორდონიც შეუერთდა.

5 გოლი ჩემპიონთა ლიგის ერთ მატჩში: ერლინგ ჰალანდი, ლუის ადრიანო და ლიონელ მესი

ერლინგ ჰალანდი (მანჩესტერ სიტი 7-0 ლაიფციგი, 14/03/2023)

ჰალანდის მიღწევა განსაკუთრებით გამორჩეულია, რადგან მან ხუთივე გოლი 63-ე წუთზე შეცვლამდე გაიტანა. პენალტის თავდაჯერებული შესრულების შემდეგ ნორვეგიელმა თავდამსხმელმა ბომბარდირის ინსტინქტები გამოავლინა და მომდევნო ორი გოლი მას შემდეგ გაიტანა, რაც კევინ დე ბრუინმა და რუბენ დიაშმა ბურთი ძელს გაარტყეს.

სწრაფმა რეაქციამ შესვენების შემდეგ ახლო მანძილიდან კიდევ ორი გოლის გატანის საშუალება მისცა. ამ გამარჯვებამ მანჩესტერ სიტი 2022/23 წლების ჩემპიონთა ლიგის მეოთხედფინალში გაიყვანა და გუნდმა საბოლოოდ ივნისში ისტორიაში პირველი ტიტული მოიპოვა.

ლუის ადრიანო (ბატე 0-7 შახტარი, 21/10/2014)

ლუის ადრიანომ პირველ ტაიმში ოთხი გოლი გაიტანა და მესის გაუთანაბრდა, რითაც გახდა ერთადერთი მოთამაშე, რომელმაც ჯგუფურ ეტაპზე (ან ლიგის ფაზაში) ერთ მატჩში ხუთი გოლი გაიტანა.

ბრაზილიელმა თავდამსხმელმა ანგარიში ქვედა მარცხენა კუთხეში ზუსტად შესრულებული პენალტით გახსნა, შემდეგ პირველი ტაიმის დასრულებამდე ახლო მანძილიდან სამი გოლი დაამატა და შეხვედრა კიდევ ერთი მშვიდად შესრულებული პენალტით დაასრულა.

ლიონელ მესი (ბარსელონა 7-1 ლევერკუზენი, 07/03/2012)

მესიმ ისტორია მაშინ დაწერა, როდესაც ბარსელონამ 2011/12 წლების ჩემპიონთა ლიგის მეოთხედფინალში გასვლა გაინაღდა.

მაშინ 24 წლის არგენტინელს მხოლოდ 24 წუთი დასჭირდა შესანიშნავი ჰეთ-თრიქის შესასრულებლად, ჯერ თავზე ეფექტური გადაგდებით გახსნა ანგარიში, შემდეგ მცველებს შორის ცეკვით გაიტანა მეორე, ხოლო შესვენების შემდეგ კიდევ ერთი თავზე ლამაზი გადაგდებით დაამატა გოლი. მოგვიანებით არგენტინელმა კიდევ ერთი ბურთითა და საჯარიმოს გარედან ზუსტი დარტყმით უპრეცედენტო ხუთ გოლს მიაღწია.

4 გოლი ჩემპიონთა ლიგის ერთ მატჩში: კრიშტიანუ რონალდუ, კილიან მბაპე, რობერტ ლევანდოვსკი...

ენტონი გორდონი ჩემპიონთა ლიგის მატჩში ოთხი გოლის გამტანი უახლესი ფეხბურთელია და შეუერთდა ისეთ მოთამაშეებს, როგორებიც არიან მესი, კრიშტიანუ რონალდუ, რობერტ ლევანდოვსკი და კილიან მბაპე, რომელიც ამ კლუბში წლევანდელი ლიგის ფაზის მე-5 ტურში გაწევრიანდა.

ლევანდოვსკი ერთადერთი ფეხბურთელია, რომელიც ამ სიაში ორჯერ ფიგურირებს და ეს ორი სხვადასხვა კლუბის შემადგენლობაში, დორტმუნდის ბორუსიასა და მიუნხენის ბაიერნში, მოახერხა.

პოლონელ თავდამსხმელს ასევე ეკუთვნის რეკორდი ოთხი გოლის ყველაზე სწრაფად გატანაში, 2019 წელს ცრვენა ზვეზდას წინააღმდეგ მის პირველ და მეოთხე გოლს შორის მხოლოდ 16 წუთი იყო. მანამდე ეს რეკორდი რონალდუს ეკუთვნოდა, რომელმაც 2015 წელს მალმიოს წინააღმდეგ ოთხი გოლი 21 წუთში გაიტანა.

ჩემპიონთა ლიგაზე პოკერის ავტორები:

ენტონი გორდონი (ყარაბაღი 1-6 ნიუკასლი, 18/02/2026)
კილიან მბაპე (ოლიმპიაკოსი 3-4 რეალი, 26/11/2025)
ჰარი კეინი (ბაიერნი 9-2 დინამო ზაგრები, 17/09/2024)
სებასტიან ალე (სპორტინგი 1-5 აიაქსი, 15/09/2021)

ოლივიე ჟირუ (სევილია 0-4 ჩელსი, 02/12/2020)

იოსიპ ილიჩიჩი (ვალენსია 3-4 ატალანტა, 10/03/2020)

რობერტ ლევანდოვსკი (ცრვენა ზვეზდა 0-6 ბაიერნი, 26/11/2019)

სერჟ გნაბრი (ტოტენჰემი 2-7 ბაიერნი, 01/10/2019)

კრიშტიანუ რონალდუ (რეალი 8-0 მალმიო, 08/12/2015)

ზლატან იბრაჰიმოვიჩი (ანდერლეხტი 0-5 პსჟ, 23/10/2013)

რობერტ ლევანდოვსკი (დორტმუნდი 4-1 რეალი, 24/04/2013)

მარიო გომესი (ბაიერნი 7-0 ბაზელი, 13/03/2012)

ბაფეტიმბი გომისი (დინამო ზაგრები 1-7 ლიონი, 07/12/2011)

ლიონელ მესი (ბარსელონა 4-1 არსენალი, 06/04/2010)

ანდრეი შევჩენკო (ფენერბაჰჩე 0-4 მილანი, 23/11/2005)

რუდ ვან ნისტელროი (მანჩესტერ იუნაიტედი 4-1 სპარტა პრაღა, 03/11/2004)