მესის მამაზე გავრცელებული ჭორის გამო ჟურნალისტები სამსახურიდან გაათავისუფლეს

არგენტინის ეროვნული ნაკრების მთავარმა მწვრთნელმა, ლიონელ სკალონიმ, ავსტრიასთან მატჩის წინ გუნდის ერთიანობას გაუსვა ხაზი.

ალბომებისა და სტიკერების პრეზენტაციაზე ატეხილი ხმაურის მსგავსად, 2026 წლის მუნდიალზე ამჯერად ლიონელ მესის ოჯახი გახდა მასშტაბური დეზინფორმაციის მსხვერპლი, რამაც ნაკრების ბანაკში დიდი ვნებათაღელვა გამოიწვია.

შოკი პირდაპირ ეთერში და მასობრივი გათავისუფლებები

სკანდალი მას შემდეგ ატყდა, რაც Luzu TV-ის წამყვანმა, ფლორენსია პენიამ, პირდაპირ ეთერში სრულიად მცდარი ინფორმაცია გაავრცელა და განაცხადა, რომ ლიონელ მესის მამა, ხორხე მესი, გარდაიცვალა. ამ სიახლემ ინტერნეტსივრცე მალევე მოიცვა და მესის ოჯახს, რომელიც ლეოს მეექვსე მუნდიალს გულშემატკივრობს, უდიდესი სტრესი მიაყენა.

მოგვიანებით ოჯახმა განმარტა, რომ ხორხე მესი ცოცხალია, უბრალოდ გეგმურ მკურნალობას გადის და თავს კარგად გრძნობს. შეცდომის გამო ტელეწამყვანი პენია სამსახურიდან გადადგა - მან აღნიშნა, რომ არასწორი ინფორმაცია ყურსასმენის საშუალებით პროდიუსერებმა მიაწოდეს. არხის ხელმძღვანელმა, ნიკოლას ოკიატომ კი ინციდენტის გამო რამდენიმე თანამშრომელი დაუყოვნებლივ გაათავისუფლა.

სკალონის პასუხი: „ნაკრები ერთიანია“

ტეხასში, ავსტრიასთან მატჩის წინ გამართულ პრესკონფერენციაზე ლიონელ სკალონიმ დეზინფორმაციაზე საუბარი მალევე დაასრულა და ყურადღება ფეხბურთზე გადაიტანა:

ჩვენ კარგად ვართ და ხვალინდელი მატჩისთვის ვემზადებით. მტკიცედ გვჯერა, რომ სწორედ გუნდურობაა ის ძალა, რომელიც ნებისმიერ კარგ თუ ცუდ სიტუაციას გადაგვალახვინებს. ვიცით, რომ მეგობრების გვერდით ყოფნა ყოველთვის საუკეთესო წამალია. ამას მთელი გუნდი გრძნობს და დარწმუნებული ვარ, ლეოც გრძნობს ჩვენს მხარდაჭერას. ამ თემაზე ზედმეტი საუბარი აღარ მსურს

ფოკუსი ავსტრიასთან მატჩზე

პირველ ტურში ალჟირის 3-0 განადგურების შემდეგ (სადაც მესიმ ჰეთ-თრიკი შეასრულა), არგენტინა ჯგუფში მეორე გამარჯვების მოპოვებას და მერვედფინალის საგზურის ნაადრევად განაღდებას გეგმავს. სკალონი აღიარებს, რომ ავსტრია აგრესიული, ორგანიზებული და პრესინგის მოყვარული გუნდია, რის გამოც მატჩი საკმაოდ რთული იქნება.