სამეფო კლუბში ცვლილებების დრო დგება.
ლა ლიგაში ბარსელონასთან 11-ქულიანი ჩამორჩენა და ცუდი შედეგები ალვარო არბელოას პოზიციებს სერიოზულად არყევს. მადრიდული გრანდის ხელმძღვანელობა აქტიურად ეძებს მაღალი პროფილის შემცვლელს და ფლორენტინო პერესის სიაში სკალონი ყველაზე საინტერესო ფიგურაა.
როგორც ესპანური El Partidazo de Cope იუწყება, კლუბსა და მწვრთნელს შორის პირველი კონტაქტი უკვე შედგა. 47 წლის სპეციალისტის რეიტინგი მსოფლიო ჩემპიონატზე ტრიუმფის შემდეგ მკვეთრად გაიზარდა. მადრიდში მიიჩნევენ, რომ სკალონის უნარი, მართოს ისეთი ვარსკვლავები, როგორიც მესია, გუნდისთვის იდეალური იქნება.
თავად სკალონი, რომელსაც არგენტინის ფეხბურთის ასოციაციასთან კონტრაქტი 2026 წლის მუნდიალის ბოლომდე აკავშირებს, ჯერჯერობით თავშეკავებულობას ინარჩუნებს:
„მხოლოდ უახლოეს მომავალზე ვფიქრობ. შორს გახედვა ჩემი სტილი არ არის, რადგან ეს კონცენტრაციაში გიშლის.“
მადრიდის რეალში არბელოას წასვლა გარდაუვალი ჩანს. იმ ფონზე, როცა სესკ ფაბრეგასის, იურგენ კლოპისა და დიდირ დეშამის გვარებიც ფიგურირებს, სკალონის კანდიდატურა ყველაზე რეალურად განიხილება. თუ შეთანხმება შედგა, ეს იქნება მადრიდელთა ერთ-ერთი ყველაზე ხმაურიანი განაცხადი ბოლო წლების განმავლობაში.
