ბარსელონა რობერტ ლევანდოვსკის შემცვლელს ეძებს და მთავარ სამიზნედ მადრიდის ატლეტიკოს ვარსკვლავი, ხულიან ალვარესი შეარჩია.
კატალონიურ გრანდში ეპოქის ცვლილება ახლოვდება. 38 წლის რობერტ ლევანდოვსკი, რომლის მიმართ ინტერესს იუვენტუსი და მილანი იჩენენ, სავარაუდოდ, თავისუფალი აგენტის სტატუსით დატოვებს გუნდს. მის ადგილზე ჰანსი ფლიკს არგენტინელი მსოფლიო ჩემპიონის ხილვა სურს.
როგორც ESPN იუწყება, ბარსელონამ მადრიდულ კლუბთან მოლაპარაკებები უკვე წამოიწყო, თუმცა ტრანსფერი რთული იქნება. ალვარესის გამოსასყიდი თანხა 500 მილიონ ევროს შეადგენს, მადრიდის ატლეტიკო კი მის სანაცვლოდ მინიმუმ 120 მილიონს ითხოვს. კატალონიელები იმედოვნებენ, რომ ფინანსური ფეირ-პლეის ახალი წესები მათ ამ გარიგების განხორციელების საშუალებას მისცემს.
ამავდროულად, ფეხბურთელის აგენტი, ფერნანდო იდალგო გავრცელებულ ხმებს კატალონიაში სახლის ძებნის შესახებ კატეგორიულად უარყოფს:
„ეს 1000%-ით სიცრუეა. მისი ოჯახის არცერთი წევრი ბარსელონაში არ ყოფილა. ბოლოს იქ მხოლოდ მატჩზე ვიმყოფებოდით.“
ლევანდოვსკის წასვლა კლუბს სახელფასო ფონდს მნიშვნელოვნად შეუმსუბუქებს, რაც ხულიან ალვარესისთვის რესურსების გამოთავისუფლების მთავარი წინაპირობაა. პარალელურად, ბარსელონა მარკუს რაშფორდის გამოსყიდვის ვარიანტსაც განიხილავს, რომელიც ამჟამად იჯარით ესპანეთში თამაშობს.
