„მეტოქეს ვაჯობეთ", - რა დააკლდა იბერიას მაკარიძის აზრით?

იბერიას მეკარემ, გიორგი მაკარიძემ, კონფერენს ლიგაში მიალბისთან შეხვედრის შემდეგ განაცხადა, რომ გუნდი გამარჯვებისთვის იბრძოდა, თუმცა სასურველი შედეგის მისაღწევად გამოცდილება არ ეყო.

„მოსაგებად გავედით. მიალბი შვედეთის ჩემპიონია და წინა სეზონის შემადგენლობა თითქმის უცვლელად ჰყავს შენარჩუნებული. ვფიქრობ, მეტოქეზე უკეთ ვითამაშეთ, მაგრამ გამოცდილება დაგვაკლდა“, - აღნიშნა მაკარიძემ.

მეკარემ გულშემატკივრების მხარდაჭერის მნიშვნელობაზეც ისაუბრა და ლარნესთან გამარჯვება გაიხსენა.

„ზოგადად, ქართველებს ყურების ჩამოყრა გვჩვევია. ლარნესთან მოგებაში კი გულშემატკივრებს დიდი წვლილი მიუძღვით. როცა ანგარიში 1:1 იყო, ტრიბუნებიდან ისეთი მუხტი მივიღეთ, რომ ძალიან დაგვეხმარა. იმ გამარჯვებაში ხალხმა მნიშვნელოვანი როლი ითამაშა.

მადლობა ყველას, ვინც დღეს მოვიდა და გვერდში დაგვიდგა“, - თქვა იბერიას მეკარემ.

კონფერენს ლიგის ძირითადი ეტაპის მესამე ტურში იბერია გასვლაზე კოპენჰაგენს დაუპირისპირდება. შეხვედრა 6 ნოემბერს გაიმართება.