მეტოქის შეცდომა და გამარჯვება - როგორ ითამაშა ფუტსალის ნაკრებმა

საქართველოს ფუტსალის ეროვნულმა ნაკრებმა, რომელიც თელავში გადის შეკრებას, პირველი ამხანაგური შეხვედრა გამართა.

ავთანდილ ასათიანის გუნდი ლიბანის ეროვნულ ნაკრებს დაუპირისპირდა და მეტოქე მინიმალური ანგარიშით, 1:0 დაამარცხა.

მატჩის ერთადერთი და გადამწყვეტი გოლი პირველ ტაიმში გავიდა. ლიბანელთა დაცვაში დაშვებული შეცდომით ვახტანგ კეკელიამ ისარგებლა და საქართველოს ნაკრები დააწინაურა. ასათიანის შეგირდებს უპირატესობის გაზრდის არაერთი შანსი და მომენტი ჰქონდათ, თუმცა მეტოქე გუნდის მეკარემ კარგად ითამაშა და დამატებითი გოლების გატანა ვეღარ მოხერხდა.

საქართველოს ფუტსალის ნაკრები მეორე ამხანაგურ შეხვედრას კვლავ ლიბანის წინააღმდეგ გამართავს. გუნდების მომდევნო დაპირისპირება 7 ნოემბერს, თბილისის დროით 14:00 საათზე დაიწყება.