უეფას მიერ ორგანიზებული 2030 წლის ფუტსალის ევროპის პირველობის საკუთარ კედლებში ჩასატარებლად სულ 7 ქვეყანა იბრძვის.
საქართველოს კონკურენციას საფრანგეთი, ფინეთი, ხორვატია, ყაზახეთი, პოლონეთი და ესპანეთი გაუწევენ. საინტერესოა, რომ ესპანეთსა და ხორვატიას მსგავსი გამოცდილება უკვე აქვთ, დანარჩენი ხუთი კანდიდატისთვის კი გამარჯვების შემთხვევაში ეს სადებიუტო მასპინძლობა იქნება.
საბოლოო გადაწყვეტილებას უეფას აღმასრულებელი კომიტეტი 2027 წლის სექტემბერში გამოაცხადებს. საქართველოს ფეხბურთის ფედერაციის გენერალური მდივნის, დავით მუჯირის განცხადებით, ჩვენს ქვეყანას უეფასთან თანამშრომლობით მაღალი დონის ღონისძიებების ორგანიზების დიდი გამოცდილება დაუგროვდა, რაც ამ ნაბიჯის გადადგმის მთავარი საფუძველი გახდა. გარდა ამისა, ქვეყანაში ფუტსალი აქტიურად ვითარდება და ამხელა ტურნირის მასპინძლობა სპორტის ამ სახეობის პროგრესისთვის უმნიშვნელოვანესი ფაქტორი იქნება.
ჩვენი ფუტსალის ეროვნული ნაკრებისთვის ევროპის ჩემპიონატი უცხო ნამდვილად არ არის, გუნდმა 2022 და 2026 წლების გათამაშებებში იასპარეზა, ხოლო 2022-ში ავთანდილ ასათიანის ხელმძღვანელობით კონტინენტის 8 საუკეთესო ნაკრებს შორის მოხვედრაც მოახერხა.
პარალელურად, საქართველო უკვე აქტიურად ემზადება 2029 წლის ფიფას 20-წლამდელთა მსოფლიო ჩემპიონატისთვის, რომელსაც სომხეთთან ერთად უმასპინძლებს.
