"მეუცნაურება, რომ წითელი ხალიჩა დაუფინეს", - ბელგიის მეკარე ნაკრებიდან კურტუას დაბრუნების გამო წავიდა

ბელგიის ნაკრების მეკარემ, კოენ კასტელსმა, გუნდში ტიბო კურტუას დაბრუნების გამო, სანაკრებო კარიერის დასრულება გადაწყვიტა.

კურტუამ ყოფილ მწვრთნელ დომენიკო ტედესკოსთან კონფლიქტის გამო ნაკრებში თამაში 2023-ში იუარა, იტალიელის გაშვების და რუდი გარსიას დანიშვნის შემდეგ კი, წელიწადნახევრის შემდეგ, განაცხადში დაბრუნდა.

„ჩემთვის ცოტა უცნაურია, რომ ტიბო კურტუას შეუძლია თავად გადაწყვიტოს, დაბრუნდეს თუ არა ნაკრებში.

ისიც მეუცნაურება, რომ ფედერაცია ყველაფერს უჯერებს და ნაკრებში დასაბრუნებლად წითელ ხალიჩას უფენს." - აღნიშნა კასტელსმა.

ტიბოს დაბრუნების გამო, კასტელსმა, რომელიც ბოლო 1.5 წლის მანძილზე ნაკრების ძირითადი მეკარე იყო, სანაკრებო კარიერის დასრულების შესახებ გამოაცხადა.