რომელი მსოფლიო ჩემპიონატი იყო ისტორიაში ყველაზე ხალხმრავალი?
ფეხბურთის მთავარი მოვლენა მილიონობით გულშემატკივარს აერთიანებს, თუმცა ერთმა კონკრეტულმა ტურნირმა დაამყარა რეკორდი, რომელიც დღემდე ხელშეუხებელია.
ტრიბუნებზე არსებული ენერგია ხშირად მოედანზე მეთორმეტე მოთამაშის ეფექტს ქმნის. მოსალოდნელია, რომ 2026 წლის მსოფლიო ჩემპიონატი, რომელსაც აშშ, მექსიკა და კანადა უმასპინძლებენ, დასწრების მხრივ ერთ-ერთი გამორჩეული იქნება. ამას ხელს უწყობს ფორმატის ცვლილებაც, ტურნირში 48 ნაკრები მიიღებს მონაწილეობას და სულ 104 მატჩი ჩატარდება.
თუმცა, არსებობს ერთი მუნდიალი, სადაც გულშემატკივართა რაოდენობამ ყოველგვარ მოლოდინს გადააჭარბა და ისტორიული პრეცედენტი შექმნა.
რომელ მუნდიალს ჰყავდა ყველაზე მეტი მაყურებელი?
Yahoo Sports-ის მონაცემებით, ყველაზე ხალხმრავალი 1994 წლის მსოფლიო ჩემპიონატი აღმოჩნდა, რომელიც ამერიკის შეერთებულ შტატებში ჩატარდა. ტურნირს ჯამში რეკორდული რაოდენობა 3,587,538 ფანი დაესწრო.
აღსანიშნავია, რომ დრამატულ ფინალს, სადაც ბრაზილიამ იტალია პენალტების სერიაში დაამარცხა, ლოს-ანჯელესის როუზ ბოულის სტადიონზე 94,194 მაყურებელი ადევნებდა თვალს.
ამ მაჩვენებელს ყველაზე მეტად 2014 წლის ბრაზილიის მუნდიალი მიუახლოვდა, რომელმაც სტადიონებზე 3,441,450 ადამიანი შეკრიბა. ბოლო ოთხი მსოფლიო ჩემპიონატის საშუალო დასწრება კი თითქმის 3 მილიონს შეადგენს.
რეკორდული მატჩები
რაც შეეხება ცალკეულ შეხვედრებს, აქ ციფრები კიდევ უფრო შთამბეჭდავია. მაგალითად, 1950 წლის ფინალს ურუგვაისა და ბრაზილიას შორის, ლეგენდარულ მარაკანაზე, დაახლოებით 173,850 ფანი დაესწრო.
კიდევ ერთი ისტორიული მატჩი 1986 წლის ფინალია, მაშინ დიეგო მარადონას არგენტინამ დასავლეთ გერმანია აცტეკას სტადიონზე 114,600 მაყურებლის თვალწინ დაამარცხა. ამავე სტადიონზე 1970 წელს მექსიკისა და ბელგიის დაპირისპირებას 108,192 ადამიანი შეესწრო.
შედარებით ახალი ისტორიიდან აღსანიშნავია ყატარი 2022-ის ფინალი, რომელსაც სტადიონზე თითქმის 89,000 გულშემატკივარი დაესწრო.
2026 წლის ჩემპიონატის მოახლოებასთან ერთად, ექსპერტები ვარაუდობენ, რომ ეს ციფრები კიდევ უფრო გაიზრდება. მონაწილე გუნდების რაოდენობის მატება და მასპინძელი ქვეყნების გიგანტური სტადიონები ახალი რეკორდების დამყარების წინაპირობაა. ფაქტია, რეკორდებს მხოლოდ ფეხბურთელები არ ამყარებენ.
