მზადება უკრაინისთვის - საქართველოს ნაკრებმა რიგაში ივარჯიშა

საქართველოს ეროვნულმა საკალათბურთო ნაკრებმა უკრაინასთან ოფიციალური მატჩის მოლოდინში, რიგაში პირველი ოფიციალური ვარჯიში გამართა.

სამწვრთნელო შტაბის ხელმძღვანელობით ჩატარებული ვარჯიში მთლიანად 2 ივლისს გასამართი, უმნიშვნელოვანესი მატჩის ტაქტიკურ მომზადებას დაეთმო.

ნაკრებისთვის კარგი სიახლეა გუნდის კაპიტნის, თორნიკე შენგელიას მწყობრში ყოფნა. თოკომ საკლუბო დონეზე გრძელი სეზონი სულ რაღაც 5 დღის წინ დაასრულა.

საქართველოს ნაკრებს უკრაინასთან და ესპანეთთან მატჩებში ვერ დაეხმარება სანდრო მამუკელაშვილი.

კალათბურთელი რამდენიმე დღის წინ თავისუფალი აგენტი გახდა და, NBA-ს რამდენიმე კლუბის მხრიდან ინტერესის მიუხედავად, ამ ეტაპზე უგუნდოდაა. აქედან გამომდინარე, მოქმედი საკლუბო კონტრაქტის არქონის გამო მისი დაზღვევა იურიდიულად შეუძლებელია. 

შეკრებაზე 15 კალათბურთელი რჩება, საიდანაც მთავარი მწვრთნელი, ალეკსანდარ ჯიკიჩი იმ 12-ს შეარჩვს, რომლებიც 2 ივლისს, რიგაში უკრაინას დაუპირისპირდებიან.

მსოფლიო ჩემპიონატის საკვალიფიკაციო ეტაპის მატჩში საქართველო 2 ივლისს უკრაინას, ხოლო 5 ივლისს ესპანეთს დაუპირისპირდება.