ნაკრების სრული კრახი დგებუაძის ზღაპრულ მატჩში - როგორ მოახერხეს ეს?!

საქართველოს 16-წლამდე კალათბურთელთა ნაკრებმა ევრობასკეტზე გამოსვლა წარუმატებლად დაიწყო.

ჩვენი გუნდი ისრაელს დაუპირისპირდა და პირველი სამივე მეოთხედი წააგო, ბოლო პერიოდი კი, რომელიც 3-ქულიანი სხვაობით მოიგო, ფორმალობა იყო - 75:97.

ქულების, ასისტებისა და ეფექტიანობის ინდექსის მხრივ, ორივე გუნდში საუკეთესო ცოტნე დგებუაძე გახლდათ - 27:35 წუთში 26 ქულა, 4 მოხსნა, 8 ასისტი შეასრულა და ეფექტიანობის ინდექსი 25 ჰქონდა.

11 ქულა მიითვალა ანდრია ჭკადუამ, ლუკა გაბისიანმა 8 ქულა ჩაიწერა აქტივში, ბუბა კვასტიანმა - 7, ხოლო ნიკოლოზ მარკოიშვილმა და ლევან გაჩეჩილაძემ - 6-6.

საქართველოს ნაკრები ჯგუფში, ისრაელის გარდა, ესპანეთთან და საბერძნეთთან არის. პირველ ტურში, ესპანელებმა ბერძნებს ოვერტაიმით მოუგეს.

რაც შეეხება ფორმატს, ჯგუფური ეტაპიდან 1/8 ფინალში ყველა, 4-ვე გუნდი გადის, ოღონდ, ქულებსა და ბურთების სხვაობას გავლენა ექნება იმაზე, პლეი-ოფში რომელ მეტოქეს შეხვდები.

საქართველოს ნაკრები მომდევნო, მე-2 ტურში ესპანეთს დაუპირისპირდება - 8 აგვისტოს 21:30 საათზე. პირდაპირი რეპორტაჟი ევრობასკეტის ოფიციალურ Youtube არხზეა, რომელიც აქვეა.