43-დღიანი საზაფხულო შესვენების შემდეგ, ეროვნული ლიგა მე-20 ტურის მატჩით, რუსთავსა და ტორპედო ქუთაისს შორის, განახლდა.
თბილისში, დავით პეტრიაშვილის სახელობის სტადიონზე გამართული შეხვედრა რუსთაველებმა მინიმალური სხვაობით მოიგეს - ერთადერთი გოლი ჟან სოუზამ პენალტიდან მე-13 წუთზე გაიტანა.
ბრაზილიელმა შემტევმა მიმდინარე ჩემპიონატში მე-6 გოლი შეაგდო და საუკეთესო ბომბარდირ ველისოლს (სამგურალი) 3 შედეგიანი დარტყმით ჩამორჩება.
რუსთავმა ტორპედოს წლევანდელ გათამაშებაში მეორედ მოუგო, ქუთაისში გამართული ურთიერთშეხვედრა კი 1:1 დასრულდა.
გია ცეცაძის გუნდმა 35 ქულა მოაგროვა და ეროვნულ ლიგას კვლავ სათავეში ჩაუდგა - იბერია 1999-ს 34 ქულა და თამაშიც ნაკლები აქვს.
რუსთაველები შემდეგ ტურში, 15 აგვისტოს, დინამო თბილისს სტუმრობენ, ხოლო ტორპედო, რომელსაც 5 ტურია აღარ მოუგია, იმავე დღეს იბერია 1999-ს რამაზ შენგელიაზე უმასპინძლებს.
