ინგლისმა აცტეკაზე ომი გამოიარა.
მსოფლიო ჩემპიონატის მორიგ 1/8 ფინალში ინგლისმა თანამასპინძელი მექსიკა ლეგენდარულ აცტეკაზე 3:2 დაამარცხა.
ამ შეხვედრაში სამ ლომს ნამდვილი ომის გამოვლა მოუწია - თამაში მასპინძელთა უპირატესობით დაიწყო, თუმცა 36 და 38-ე წუთებზე ჯუდ ბელინგემმა მუნდიალების ისტორიაში ერთ-ერთი ყველაზე სწრაფი დუბლი შეასრულა და მოულოდნელი ანგარიში 2:0 დააფიქსირა, რომელიც ტაბლოზე დიდხანს არ შენარჩუნებულა - მექსიკელთა მთავარმა მეგოლემ კინიონესმა ერთი ბურთი ოთხ წუთში გაქვითა და მექსიკა თამაშში დააბრუნა.
შესვენების შემდეგ ინგლისის მდგომარეობა წითელმა ბარათმა დაამძიმა, რომელიც ჯარელ ქუანსამ უხეშობისთვის 54-ე წუთზე მიიღო. მიუხედავად კაცნაკლულად დარჩენისა, ენტონი გორდონის დამსახურებით ინგლისმა მალევე პენალტი მოიპოვა, რომელიც ჰარი კეინმა შეაგდო და ორბურთიანი სხვაობა აღადგინა.
69-ე წუთზე ჰარი კეინმა თავის საჯარიმოში უყურადღებოდ ითამაშა და პენალტი ამჯერად მექსიკელთა სასარგებლოდ დაინიშნა, რომელიც რაულ ხიმენესმა შეაგდო და მექსიკა თამაშში კიდევ ერთხელ დააბრუნა.
დარჩენილ დროში ინგლისის ნაკრები გაძლებაზე იყო გადასული და ურთულეს პირობებში, ზღვის დონიდან 2200 მეტრზე მყოფ სტადიონზე 10 კაცით უწევდა თავის დაცვა.
საბოლოოდ, ტუხელის გუნდმა უპირატესობა შეინარჩუნა და მექსიკას აცტეკაზე გამართულ 90-ე მატჩში მხოლოდ და მხოლოდ მე-3 მარცხი აგემა. სამი ლომი პირველი ევროპული გუნდი გახდა, რომელმაც მექსიკა ამ ლეგენდარულ სტადიონზე დაამარცხა.
ინგლისი 1/4 ფინალში გავიდა, სადაც ბრაზილიის გამომგდებ ნორვეგიის ნაკრებს დაუპირისპირდება, რომელიც აღნიშნულ ეტაპზე ისტორიაში პირველად ითამაშებს.
