შაბათს, სერია A-ს მე-8 ტურის ცენტრალურ მატჩში, ნეაპოლში, დიეგო არმანდო მარადონაზე მასიმილიანო ალეგრის ნაპოლი ჯან პიერო გასპერინის რომას დაუპირისპირდება.
ჩემპიონთა ლიგაზე მოპოვებული გამარჯვებების (ნაპოლიმ ბოდო/გლიმტი 4:3 დაამარცხა, რომამ კი სლოვან ბრატისლავა 4:0 გაანადგურა) მიუხედავად, შიდა ჩემპიონატში გუნდების მდგომარეობა რადიკალურად განსხვავებულია. ნაპოლი 10 ქულით მე-9 ადგილზეა და წინა ტურში ვენეციასთან მოულოდნელი მარცხის შემდეგ, ვითარების გამოსწორებას ეცდება.
საქმეს ალეგრის გუნდის საკადრო პრობლემებიც ართულებს, მასპინძლებს ტრავმების გამო დავიდ ნერეში, ალისონ სანტოსი, კოსტანტინო ფავასული და ალესანდრო ბონჯორნო ვერ დაეხმარებიან.
მეორე მხრივ, გასპერინის რომა სერია A-ს მიმდინარე სეზონში დაუმარცხებელია. დედაქალაქელები 17 ქულით მე-3 პოზიციას იკავებენ, საჩემპიონო რბოლაში არიან და ლიგაში საუკეთესო დაცვით გამოირჩევიან (სულ რაღაც 3 გაშვებული გოლი).
სპორტული ანალიტიკოსებისა და სტატისტიკის მიხედვით, საკმაოდ დაძაბული და ტაქტიკური ბრძოლა გველის. ექსპერტთა ვარაუდით, შეხვედრა შესაძლოა ფრედ დასრულდეს, რადგან ამ გუნდების ბოლო 5 დაპირისპირებიდან 3 მსგავსად დასრულდა. მიუხედავად რომას ძლიერი დაცვისა,მოსალოდნელია, რომ კარის აღებას ორივე გუნდი შეძლებს.
ამასთან, ტენდენციებიდან გამომდინარე, დიდია ალბათობა, რომ ანგარიში რომაელებმა გახსნან (ბოლო 7 მატჩიდან 6-ში პირველებმა გაიტანეს), თუმცა გულშემატკივრებმა ზედმეტად უხვგოლიან და ღია სანახაობას არ უნდა დაელოდონ. ყველაფერი გუნდების პრაგმატულ მიდგომებზე იქნება დამოკიდებული.
