ბრაზილიის ნაკრების ექიმმა, როდრიგო ლასმარმა, ნეიმარის მარჯვენა წვივზე ჩატარებული გამოკვლევის შედეგები გამოაცხადა. ფეხბურთელს მე-2 ხარისხის დაზიანება აღმოაჩნდა, რის გამოც აღდგენას ორიდან სამ კვირამდე დასჭირდება.
ამრიგად, ვარსკვლავი ოფიციალურად გამოტოვებს პანამისა და ეგვიპტის წინააღმდეგ გასამართ ამხანაგურ შეხვედრებს, რომლებიც ბრაზილიისთვის მსოფლიო ჩემპიონატის წინ ბოლო მოსამზადებელი მატჩებია. ექიმების პროგნოზით, ნეიმარის თამაში მუნდიალის პირველ ტურშიც, 13 ივნისს მაროკოს წინააღმდეგ, დიდი კითხვის ნიშნის ქვეშ დგას.
ექიმმა განაცხადა:
ის ნაკრებში გამოცხადდა, ყველა სამედიცინო შემოწმება გაიარა და მაგნიტურ-რეზონანსულმა ტომოგრაფიამ წვივის მე-2 ხარისხის დაზიანება აჩვენა. ის მკურნალობას აგრძელებს და იმედი გვაქვს, 2-3 კვირაში მზად იქნება. ჩვენთან ერთად ის ინტენსიურ რეაბილიტაციას გაივლის და მის მდგომარეობას ყოველდღიურად დავაკვირდებით.
ნაკრების სამედიცინო შტაბის ეს განცხადება ნათელი მესიჯია სანტოსის ექიმების მისამართით, რომლებიც მანამდე ამბობდნენ, რომ ნეიმარს მხოლოდ მსუბუქი შეშუპება ჰქონდა. ფეხბურთელი წვივის არეში ტკივილს ჯერ კიდევ კორიტიბასთან მატჩის შემდეგ გრძნობდა.
სებეეფს (CBF) თავიდანვე ჰქონდა ეჭვი, რომ სანტოსი და ნეიმარის გარემოცვა რეალურ სიტუაციას მალავდნენ, რის გამოც ფეხბურთელს გამოკვლევა ნაკრების ბაზაზე თავიდან ჩაუტარეს.
ბრაზილიის ნაკრების ახალ მთავარ მწვრთნელს, კარლო ანჩელოტის, ეჭვები ნეიმარის ფორმაზე ჯერ კიდევ შემადგენლობის დასახელებამდე ჰქონდა. სწორედ ამიტომ, იტალიელ სპეციალისტს განაცხადის ორი სხვადსხვა ვარიანტი ჰქონდა მომზადებული. მან საბოლოოდ მაინც ნეიმარი აირჩია, თუმცა რისკები თავიდანვე გათვლილი ჰქონდა.
ტექნიკურად ანჩელოტის ამ სიტუაციიდან გამოსავალი აქვს, რადგან ფიფას წესებით, მსოფლიო ჩემპიონატის პირველ მატჩამდე 24 საათით ადრე ტრავმირებული მოთამაშის ჩანაცვლება სრულიად ლეგალურია. ვინაიდან იტალიელ სპეციალისტს ალტერნატიული სია წინასწარვე მზად ჰქონდა, მას შეუძლია ნეიმარის ნაცვლად ახალი ფეხბურთელი უპრობლემოდ შეიყვანოს განაცხადში. ბრაზილიის ნაკრები ვარჯიშს დღეს განაახლებს, თუმცა ნეიმარი მოედანზე, რა თქმა უნდა, ვერ გავა.
