ოჩოა რეკორდულ მუნდიალზე წავა, შემდეგ კი კარიერას დაასრულებს

მემო ოჩოას სურს მსოფლიო ჩემპიონატის ისტორიაში შევიდეს და ამის შემდეგ ბუცები ლურსმანზე ჩამოკიდოს.

როგორც ფაბრიციო რომანომ ბოლო საათებში გაავრცელა ინფორმაცია, გილიერმო ოჩოა მექსიკის ნაკრებთან ერთად მსოფლიო ჩემპიონატზე გაემგზავრება, იქნება განაცხადში და ტურნირის დასრულების შემდეგ როგორც საკლუბო, ისე სანაკრებო კარიერას დაასრულებს. 

მეკარე ისტორიულ ნიშნულს მიაღწევს - 6 მსოფლიო ჩემპიონატში მონაწილეობას, რასაც ამ ტურნირზე კრიშტიანუ რონალდუსა და ლეო მესისთან ერთად შეძლებს. მან 2006 წლიდან ყველა გათამაშებაში მიიღო მონაწილეობა.

მემო გერმანიაში გამართულ მსოფლიო ჩემპიონატზე მე-3 მეკარის სტატუსით წავიდა და არ უთამაშია; 2010 წელს სამხრეთ აფრიკაში ის მე-2 მეკარე იყო და ასევე არ უთამაშია, რადგან ოსკარ პერესს ჩამორჩებოდა, შემდეგ კი 2014, 2018 და 2022 წლებში გუნდის ერთ-ერთ მთავარ ფიგურად იქცა.

მექსიკა 2026 წლის მსოფლიო ჩემპიონატის ერთ-ერთი მასპინძელია და ჯგუფში სამხრეთ აფრიკის, სამხრეთ კორეისა და ჩეხეთის ნაკრებებს დაუპირისპირდება.