ოფიციალურად: გულიაშვილი კარიერას ესპანეთში გააგრძელებს

რასინგ სანტანდერმა და სარაევომ ქართველი თავდამსხმელის, გიორგი გულიაშვილის ტრანსფერზე შეთანხმებას მიაღწიეს.

საქართველოს ნაკრების ფეხბურთელმა ესპანურ კლუბთან კონტრაქტი 2029 წლის 30 ივნისამდე გააფორმა.

"გიორგი გულიაშვილი თბილისში, საქართველოში, 2001 წლის 5 სექტემბერს დაიბადა. მას შეუძლია შეტევის ხაზის ნებისმიერ პოზიციაზე თამაში.

მან ბოლო სამი სეზონი სარაევოში, ბოსნიის პრემიერ ლიგაში გაატარა (2025 წელს თასის გამარჯვებული), სადაც 70 მატჩი ჩაატარა, 23 გოლი გაიტანა და 15 საგოლე გადაცემა შეასრულა.

ბოსნიის დედაქალაქში თამაშის გარდა, გიორგის უთამაშია ველეჟ მოსტარში (ასევე ბოსნიის პრემიერ ლიგაში) და ქართულ კლუბ იბერია 1999-ში (საბურთალო).

საერთო ჯამში, პროფესიონალურ ფეხბურთში მას ჩატარებული აქვს 203 მატჩი, გატანილი აქვს 45 გოლი და შესრულებული აქვს 26 საგოლე გადაცემა.

გიორგი გულიაშვილი, რომლის სიმაღლე 1.76 მეტრია და წონა - 66 კილოგრამი, აქამდე სარაევოს კაპიტანი იყო.

მას საქართველოს ეროვნულ ნაკრებში ჩატარებული აქვს 6 მატჩი, ხოლო ასაკობრივ ნაკრებებში (U16-დან U21-მდე) მონაწილეობა მიღებული აქვს 61 შეხვედრაში." - წერია ესპანური კლუბის ოფიციალურ განცხადებაში.

ქართველი ფეხბურთელი რასინგში 22-ნომრიანი მაისურით იასპარეზებს.

სანტანდერული გუნდი ლა ლიგა 2-ს 20 ტურის შემდეგ 38 ქულით ლიდერობს და ლა ლიგაში დაწინაურებისთვის იბრძვის.

რასინგი ასევე კოპა დელ რეიზე ასპარეზობასაც აგრძელებს, სადაც 1/8 ფინალში ბარსელონას დაუპირისპირდება. მატჩი 16 იანვარს გაიმართება.

გულიაშვილი ლა ლიგა 2-ში მე-3 ქართველია - იური ტაბატაძე კადისში ასპარეზობს, ლუკა გაგნიძე კი - გრანადაში.