ავტორიტეტულმა გამოცემა GOAL-მა ჩემპიონთა ლიგის ფინალის დასრულების შემდეგ ოქროს ბურთის 2026 წლის ნომინანტთა რეიტინგი განაახლა.
ვინაიდან წინ მსოფლიო ჩემპიონატია, მთავარი ბრძოლა ამერიკაში გადაინაცვლებს, თუმცა ევროპული სეზონის ფინიშმა ათეულში ძალთა ბალანსი უკვე შეცვალა.
წარმოგიდგენთ ოქროს ბურთის მოპოვების 10 მთავარ ფავორიტს:
10. ერლინგ ჰალანდი (მანჩესტერ სიტი):
მიუხედავად ჩემპიონთა ლიგიდან გამოვარდნისა, ჰალანდმა სეზონში 51 გოლი გაიტანა და ასოციაციისა და ლიგის თასები მოიგო. მისი შანსები გაიზარდა იმითაც, რომ ნორვეგიის ნაკრები 1998 წლის შემდეგ პირველად გავიდა მსოფლიო ჩემპიონატზე.
9. დეკლან რაისი (ლონდონის არსენალი):
რაისი პრემიერლიგის მოგების ერთ-ერთი მთავარი შემოქმედი გახდა, თუმცა ჩემპიონთა ლიგის ფინალში მარცხმა მისი პოზიციები შეასუსტა.
8. ლუის დიასი (მიუნხენის ბაიერნი):
კოლუმბიელმა გერმანიაში სადებიუტო სეზონშივე ტრებლს (ბუნდესლიგა, თასი, სუპერთასი) მიაღწია 28 გოლითა და 25 ასისტით. ის მსოფლიო ჩემპიონატზე თავისი ნაკრების მთავარი იმედია.
7. ხვიჩა კვარაცხელია (პარი სენ-ჟერმენი):
ქართველი ვარსკვლავი ჩემპიონთა ლიგის პლეი-ოფის საუკეთესო მოთამაშე გახდა - ისტორიაში პირველი, ვინც ზედიზედ 7 საპლეიოფო მატჩში გაიტანა ან ასისტი გააკეთა და პსჟ-ს თასი შეანარჩუნებინა. რეიტინგში მის მაქსიმალურ წინსვლას მხოლოდ საქართველოს ნაკრების მსოფლიო ჩემპიონატზე არყოფნა ზღუდავს.
6. კილიან მბაპე (მადრიდის რეალი):
მბაპემ სეზონში 48 გოლი გაიტანა, თუმცა რეალთან ერთად ტიტულების გარეშე დარჩა. მისი მთავარი შანსი კვლავ მსოფლიო ჩემპიონატზე საფრანგეთის ნაკრებთან ერთად ბრწყინვალებაა.
5. მაიკლ ოლისე (მიუნხენის ბაიერნი):
24 წლის ფრანგმა ბაიერნში ფენომენალური სეზონი ჩაატარა (23 გოლი, 33 ასისტი) და საფრანგეთის ნაკრების სასტარტო შემადგენლობაშიც ადგილი დაიმკვიდრა.
4. ვიტინია (პარი სენ-ჟერმენი):
ბევრი მას პლანეტის საუკეთესო ნახევარმცველად მიიჩნევს. პსჟ-სთან ერთად ჩემპიონთა ლიგისა და ლიგა 1-ის მოგების შემდეგ, ის ფინალის საუკეთესო მოთამაშედ დასახელდა.
3. ლამინ იამალი (ბარსელონა):
25 გოლითა და 20 ასისტით იამალი სეზონის დაწყების წინ მთავარი ფავორიტი იყო. ტრავმამ სეზონი ნაადრევად დაასრულებინა, თუმცა თუ მუნდიალის პლეი-ოფებისთვის ესპანეთის ნაკრებს დაუბრუნდება, ჯილდოს მოგების შანსს შეინარჩუნებს.
2. უსმან დემბელე (პარი სენ-ჟერმენი):
ოქროს ბურთის მოქმედმა მფლობელმა ტრავმების შემდეგ ფორმა იდეალურად აღიდგინა, ლივერპულისა და ბაიერნის დამარცხების შემდეგ, გოლი ფინალშიც გაიტანა და პსჟ-ს ტიტული შეუნარჩუნა. ის ჰარი კეინის მთავარი კონკურენტია.
1. ჰარი კეინი (მიუნხენის ბაიერნი):
რეიტინგის სათავეში ბაიერნის ინგლისელი ფორვარდია. კეინმა გერმანიაში პირველი გუნდური ტიტულები მოიგო და სეზონი ფანტასტიკური 65 გოლით დაასრულა.
