ფეხბურთის ყურება უფასო ხდება? - საფეხბურთო რევოლუცია

მადრიდის რეალის პრეზიდენტმა, ფლორენტინო პერესმა, საფეხბურთო და ბიზნეს სამყაროში ნამდვილი ბომბი ააფეთქა.

გუნდში არსებული შიდა კრიზისისა და უტიტულო სეზონის ფონზე, პერესმა საარჩევნო კამპანია დაიწყო და ხმაურიანი განცხადებები გააკეთა. ტელეკომპანია Chiringuito-ს ეთერში ხოსეპ პედრეროლთან ექსკლუზიურ ინტერვიუში მან აღნიშნა, რომ ფეხბურთი გულშემატკივრისთვის უფასო უნდა გახდეს.

როგორც ირკვევა, ეს მხოლოდ წინასაარჩევნო დაპირება არ არის. რეალმა უეფას (UEFA) წინააღმდეგ სუპერლიგის გამო დაწყებული მილიარდიანი სასამართლო დავა სწორედ იმ პირობით შეაჩერა, რომ ალექსანდერ ჩეფერინის ორგანიზაცია ტელეუფლებების ახალ მოდელზე მოლაპარაკებებს დათანხმდებოდა. გეგმის მიხედვით, შეიქმნება გლობალური ციფრული პლატფორმა (მსგავსი Superliga-ს მიერ დაანონსებული "Unify"-სა), რომელიც ჩემპიონთა ლიგის, ევროპა ლიგისა და კონფერენს ლიგის მატჩებს სრულიად უფასოდ, ღიად გადასცემს, შემოსავალს კი ინტეგრირებული გიგანტური სარეკლამო კამპანიებიდან მიიღებს.

უეფა, რომელიც აქამდე მკაცრად იცავდა ფასიანი ტრანსლაციების მოდელს, სუპერლიგის შიშით უკვე ახლოსაა პოზიციების დათმობასთან.

ეს პროექტი პირდაპირ საფრთხეს უქმნის ისეთ სატელეკომუნიკაციო გიგანტებს, როგორებიც არიან Movistar და Orange. მხოლოდ ესპანეთში Telefónica-ს (Movistar) ჩემპიონთა ლიგის ტრანსლაციის უფლებები 2031 წლამდე 1.4 მილიარდ ევროდ აქვს ნაყიდი. წამყვანი ოპერატორებისთვის ფეხბურთის პაკეტები ყველაზე მომგებიანი "Premium" კლიენტების მოზიდვის მთავარი იარაღია. ტელეკომპანიების წარმომადგენლები პერესის გეგმებს ჯერჯერობით სკეპტიკურად უყურებენ და მას ჰაერში ნასროლ სიტყვებს უწოდებენ, თუმცა რეალური მოლაპარაკებების დაწყებამ ბაზარზე პანიკა უკვე გამოიწვია.