ფერან ტორესმა კრიტიკოსებს პასუხი მოედანზე გასცა.
ესპანიოლთან 4:1 მოგებულ დერბიში მისმა დუბლმა ბევრ რამე აშკარა გახადა. ატლეტიკოსთან ჩემპიონთა ლიგის საპასუხო მეოთხედფინალის წინ, ესპანელი ფორვარდმა უკეთეს დროს ვერც ინატრებდა გოლის გასატანად.
VIDEO: უზარმაზარი ნაბიჯი ჩემპიონობისკენ — ბარსელონამ კატალონიური დერბი მოიგო
ფერანს მშრალი სერია საკმაოდ გაეწელა, მას ბოლოს გატანილი 31 იანვარს ელჩესთან ჰქონდა. მას შემდეგ 13 მატჩი და ორი თვე ისე გავიდა, ტორესი მეტოქის კარს ვერ იპყრობდა. დერბიში ჰეთ-თრიქიც შეეძლო, მაგრამ ერიკ გარსიას პასის შემდეგ მისი თავური VAR-მა მილიმეტრიანი თამაშგარეს გამო გააუქმა.
პირველი გოლის აღნიშვნისას ფერანმა ჟესტიკულაციით მიანიშნა ყველას, რომ მისი კრიტიკა დროზე ადრე დაიწყეს. ამ დუბლით მან სეზონში გატანილი გოლების რაოდენობა 18-მდე გაზარდა, ლა ლიგაში კი 14 ბურთი დაუგროვდა. ამ მაჩვენებლით მან უკვე ჩამოიტოვა რობერტ ლევანდოვსკი (12 გოლი) და ბომბარდირთა დავაში ლამინ იამალს მიუახლოვდა.
ეს ყველაფერი ფერანისთვის საიუბილეო, 201-ე მატჩში მოხდა. წინა შეხვედრა ატლეტიკოსთან მისთვის მე-200 იყო, თუმცა მაშინ შეცვლაზე შესულმა ვერაფერი გააწყო.
ახლა სიტუაცია შეიცვალა. Mundo Deportivo-ს თქმით, მადრიდში გასამართ საპასუხო მატჩში ლევანდოვსკის ადგილი გარანტირებული აღარაა. პირველ შეხვედრაში, რომელიც მადრიდელებმა 2:0 მოიგეს, კუბარსის გაძევების შემდეგ ფლიკმა პოლონელი ნაადრევად შეცვალა. ფერანის ასეთმა შედეგიანობამ კი მწვრთნელს დიდი საფიქრალი გაუჩინა.
