მადრიდის რეალის მთავარმა მწვრთნელმა, ალვარო არბელოამ, ჩემპიონთა ლიგის მეოთხედფინალის საპასუხო მატჩისთვის მარჯვენა ფლანგის შემადგენლობა თითქმის საბოლოოდ ჩამოაყალიბა.
მომავალ ოთხშაბათს ბლანკოსი მიუნხენის ბაიერნს ალიანს არენაზე ესტუმრება.
მადრიდული გამოცემა MARCA-ს ინფორმაციით, არბელოა მიიჩნევს, რომ დანი კარვახალი ჯერ კიდევ არ იმყოფება ოპტიმალურ ფიზიკურ ფორმაში. თუ ბოლო მომენტში გეგმები არ შეიცვალა, მოსალოდნელია, რომ ესპანელი სპეციალისტი ბავარიელების წინააღმდეგ სასტარტო შემადგენლობაში ტრენტ ალექსანდერ-არნოლდს დააყენებს.
Marca ხაზგასმით აღნიშნავს, რომ ეს არჩევანი მხოლოდ ფეხბურთელების ამჟამინდელ ფიზიკურ კონდიციებზეა დამოკიდებული და არა მათ სათამაშო კლასებს შორის სხვაობაზე. ბოლო მატჩებში ორივე ფეხბურთელი დაახლოებით თანაბარ დონეს აჩვენებს, რაც მათ სათამაშო დროშიც აისახა.
რეალს რთული მისია აქვს შესასრულებელი, გუნდმა უნდა შემოაბრუნოს გასულ სამშაბათს სანტიაგო ბერნაბეუზე მიღებული შედეგი, სადაც ბაიერნთან საკუთარ მოედანზე 1:2 დამარცხდა. არბელოასთვის ამ მატჩში თითოეული დეტალი და ფეხბურთელების ფიზიკური მზაობა გადამწყვეტი იქნება.
