ლაპორტას წინასწარმეტყველება: მბაპემ რეალის გასახდელი არია?

სანტიაგო ბერნაბეუს კედლებში დაძაბულობა პიკს აღწევს.

კილიან მბაპე მადრიდულ კლუბში უკვე მეორე სეზონს ატარებს, თუმცა მისი გოლების სტატისტიკა გულშემატკივრებისა და ექსპერტების დასარწმუნებლად საკმარისი აღარ არის. ზედიზედ ორი უტიტულო სეზონის შემდეგ, ფლორენტინო პერესის „ახალი გალაქტიკოსის“ პროექტის მიმართ ეჭვები სულ უფრო იზრდება.

მოედანზე შექმნილი კრიზისის ფონზე, საფეხბურთო სამყარომ ბარსელონას პრეზიდენტის, ჟოან ლაპორტას წინასწარმეტყველური სიტყვები გაიხსენა. 2024 წლის მარტში Mundo Deportivo-სთან საუბრისას ლაპორტა დარწმუნებით ამბობდა, რომ ფრანგი ვარსკვლავის მოსვლა არა საჩუქარი, არამედ შიდა დაპირისპირებების საბაბი გახდებოდა.

ლაპორტა ჯერ კიდევ მაშინ ამას ასე ხსნიდა:

მათ პრობლემა ექნებათ.. მოუწევთ რომელიმე ფეხბურთელის გაყიდვა, რადგან ისინი (მბაპე და ვინისიუსი) ერთ პოზიციაზე თამაშობენ. რაც შეეხება ხელფასებს, ეს გასახდელში უთანხმოებას ნამდვილად გამოიწვევს.

ორი წლის შემდეგ ლაპორტას გაფრთხილება რეალობად იქცა. იმის ნაცვლად, რომ მბაპეს მოსვლის შემდეგ რომელიმე ვარსკვლავი გაეშვათ, კლუბი ახლა რთული ტაქტიკური დილემის წინაშე დადგა. მწვრთნელმა ვერ იპოვა სისტემა, სადაც მბაპე და ვინისიუს ჟუნიორი ერთმანეთს შეეწყობიან, რადგან ორივე ბუნებრივად მარცხენა ფლანგისკენ იწევს. ამან გუნდს შეტევაში ბალანსი და ის იდენტობა დაუკარგა, რომელიც ბოლო წლებში აკავშირებდა.

ამ ყველაფერმა გასახდელამდეც მიაღწია: ვრცელდება ინფორმაცია, რომ ვინისიუს ჟუნიორთან კონტრაქტის გახანგრძლივებაზე მოლაპარაკებები შეფერხდა. ბრაზილიელი ხელფასის მომატებას ითხოვს, რათა მისი ფინანსური პირობები გუნდის ახალი მე-10 ნომრის სტატუსსა და საბაზრო ღირებულებას შეესაბამებოდეს.

მხოლოდ გოლებს ტიტულები არ მოაქვს. ზოგიერთი ანალიტიკოსი მიიჩნევს, რომ მბაპეს მოსვლამ გუნდური ერთიანობა დაასუსტა. მიუხედავად შთამბეჭდავი პირადი სტატისტიკისა, კრიტიკოსები აღნიშნავენ, რომ მის გოლებს რეალისთვის წარმატება არ მოუტანია. ახლა მადრიდულ კლუბს შიდა „წმენდა“ სჭირდება სპორტული პროექტის გადასარჩენად, რადგან სულ უფრო ხშირად ისმის მოსაზრება, რომ პერესმა ამ მილიარდიანი გარიგების შედეგები არასწორად გათვალა.