ალექს პერეირამ, რომელიც კვირას UFC Freedom 250-ზე სირილ განესთან დებიუტისთვის ემზადება, ჯოშ ჰოკიტის მომავალთან დაკავშირებით მოულოდნელი განცხადება გააკეთა.
მიუხედავად იმისა, რომ ჰოკიტმა არაერთხელ სცადა ბრაზილიელი ვარსკვლავის პროვოცირება, პერეირა თვლის, რომ სკანდალური მებრძოლის დღეები UFC-ში დათვლილია.
მედია დღის განმავლობაში გამართულ პრესკონფერენციაზე პერეირამ აღნიშნა, რომ მას არ სურს ჰოკიტის გართობა ან მის პროვოკაციებზე რეაგირება. ალექსის თქმით, მას ინფორმაცია აქვს იმის შესახებ, რომ UFC-ის ხელმძღვანელობა ჰოკიტის ქცევით უკმაყოფილოა და შესაძლოა, კვირის ბრძოლის შემდეგ მას კონტრაქტი შეუწყვიტონ.
ჰოკიტმა თავი გამოიჩინა პრესკონფერენციებზე არასტანდარული რითმებით, ილია თოფურიასთან მომხდარი კონფლიქტით, რომელიც წყლის ბოთლის სროლით დასრულდა, და მებრძოლების მიმართ უპატივცემულო დამოკიდებულებით. პერეირამ ხაზი გაუსვა, რომ UFC-ს ოჯახები და ბავშვები უყურებენ, ხოლო ჰოკიტის ქმედებები, მისი შეფასებით, უკიდურესად უპატივცემულოა, რაც, სავარაუდოდ, ორგანიზაციის მხრიდან მისი გაშვების მთავარი მიზეზი გახდება.
თოფურიასთან კონფლიქტის შედეგი - ჰოკიტი პრესკონფერენციის მიღმა
მიუხედავად მოსალოდნელი გათავისუფლებისა, ჰოკიტს კვირას დერიკ ლუისთან ბრძოლა მაინც მოუწევს, რადგან ის უკვე ჩართულია საბრძოლო ბარათში, თუმცა მისი შემდგომი ბედი ორგანიზაციაში ბურუსითაა მოცული. პერეირას მტკიცებით, მიუხედავად იმისა, რომ UFC-ში შონ სტრიკლენდის მსგავსი სკანდალური პერსონაჟებიც სარგებლობენ თავისუფლებით, ჰოკიტის სისტემური პროვოკაციები სხვა მებრძოლების მიმართ შესაძლოა ზღვარს სცდება. შესაბამისად, პერეირა აღნიშნავს, რომ ჰოკიტზე საუბარიც კი აღარ ღირს, რადგან ის მალე UFC-ის ნაწილი აღარ იქნება.
