აზერბაიჯანის დედაქალაქ ბაქოში ფორმულა 1-ის გრან პრი გაიმართა.
რბოლა ცუდად დაიწყო მაკლარენისთვის - ჩემპიონატის ლიდერი ოსკარ პიასტრი ბარიერს შეეჯახა და რბოლას სტარტზევე გამოეთიშა.
მთელი რბოლის განმავლობაში პოზიცია არ დაუთმია მაქს ვერსტაპენს, რომელმაც კვალიფიკაციაზე პოულ პოზიცია მოიპოვა და საბოლოოდ ბაქოში დამაჯერებელი გამარჯვებაც მოიპოვა.
ნიდერლანდელმა გრანდ სლემი შეასრულა, რაც პოულ პოზიციას, უსწრაფეს წრეს, მთლიან რბოლაში ლიდერობასა და გამარჯვებას მოიცავს.
მაქსმა ფორმულა 1-ში მე-6 გრანდ სლემი ჩაიწერა აქტივში, ამ შედეგით კი ლუის ჰამილტონს გაუთანაბრდა. ჯამში კი ვერსტაპენმა ფორმულა 1-ში 67-ე რბოლა მოიგო.
პოდიუმზე მეორე პოზიცია მერსედესის ბრიტანელმა პილოტმა, ჯორჯ რასელმა დაიკავა, მესამე ადგილი კი სენსაციურად უილიამსის ესპანელმა მრბოლელმა, კარლოს საინსმა მოიპოვა.
კარლოს საინსი გახდა ისტორიაში მეორე მრბოლელი, რომელიც პოდიუმზე მაკლარენის, ფერარისა და უილიამსის რიგებში ავიდა. პირველმა ეს ალან პროსტმა შეძლო. ეს კი 2021 წლის შემდეგ უილიამსის პირველი პოდიუმია.
"ეს ჩემი კარიერის საუკეთესო პოდიუმია." - განაცხადა ესპანელმა რბოლის შემდეგ რადიოში.
ბაქოში საუკეთესო ათეული ასე დაკომპლექტდა:
1. მაქს ვერსტაპენი(რედ ბული) - 25 ქულა
2. ჯორჯ რასელი (მერსედესი) - 18 ქულა
3. კარლოს საინსი (უილიამსი) - 15 ქულა
4. კიმი ანტონელი (მერსედესი) - 12 ქულა
5. ლიამ ლოუსონი (რეისინგ ბულსი) - 10 ქულა
6. იუკი ცუნოდა (რედ ბული) - 8 ქულა
7. ლანდო ნორისი (მაკლარენი) - 6 ქულა
8. ლუის ჰამილტონი (ფერარი) - 4 ქულა
9. შარლ ლეკლერი (ფერარი) - 2 ქულა
10. ისაკ ჰაჯარი (რეისინგ ბულსი) - 1 ქულა
მრბოლელთა საჩემპიონო დავაში ასეთი სიტუაციაა, მაქს ვერსტაპენი ლიდერ პიასტრის 69 ქულით ჩამორჩება, ლანდო ნორისი კი - 25 ქულით.
1. ოსკარ პიასტრი - 324 ქულა
2. ლანდო ნორისი - 299 ქულა
3. მაქს ვერსტაპენი - 255 ქულა
ფორმულა 1-ის მორიგი გრან პრი სინგაპურში 3-5 ოქტომბერს გაიმართება.
