ფინალში სეტწაუგებლად გავიდა - შაფათავა ანტალიის ტურნირის სატიტულო მატჩში ითამაშებს

თურქეთის ქალაქ ანტალიაში მიმდინარე ქალთა W35 კატეგორიის ტურნირზე, სოფია შაფათავა ფინალში გავიდა.

36 წლის ქართველმა, 1/8 ფინალისა (6:3; 6:2) და 1/4 ფინალის (6:0; 6:0) მსგავსად, 1/2 ფინალური მატჩიც იოლად, ორ სეტში მოიგო - ლატვიელ ადელინა ლახინოვას 6:1; 6:3 აჯობა. აღსანიშნავია, რომ 3 თამაშში ჯამურად მხოლოდ 9 გეიმი აქვს წაგებული.

სოფია ფინალურ შეხვედრაში დაუპირისპირდება 21 წლის ჩეხ ჯულია შტრუპლოვას, რომელიც ტურნირზე მე-6 ნომრად არის განთესილი - 1/2 ფინალში პირველი განთესვის მქონე მეტოქეს, ასევე ორ სეტში (7:6; 6:2), მოუგო.

შაფათავა (WTA-ის რეიტინგის 417-ე ნომერი) და შტრუპლოვა (388-ე) პირველ ურთიერთშეხვედრას გამართავენ. ჩეხს კარიერაში 6 ტიტული აქვს მოგებული, ქართველს - 3. 

ფინალური მატჩი 30 ნოემბერს, თბილისის დროით 11:00 საათიდან დაიწყება.