აშშ-ის ნაკრების მთავარი მწვრთნელი, მაურისიო პოჩეტინო, დარწმუნებულია, რომ პსჟ-ში ლიონელ მესის, ნეიმარისა და კილიან მბაპეს ტრიოსთან ერთად ძლიერი გუნდის ჩამოყალიბება შესაძლებელი იყო.
პოჩეტინომ აღნიშნა, რომ ვარსკვლავური შემადგენლობის მიუხედავად, მთავარი პრობლემა დროის სიმცირე აღმოჩნდა:
ვთვლი, რომ ეს შესაძლებელი იყო. მე და ჩემი შტაბი გუნდში რომ დავრჩენილიყავით, დარწმუნებული ვარ, მივიღებდით ისეთ გადაწყვეტილებებს, რომლებიც ვარსკვლავების შენარჩუნების პარალელურად მიზნამდე მიგვიყვანდა. ჩვენ ამასთან ძალიან ახლოს ვიყავით.
მისი თქმით, მესის ადაპტაციისთვის დრო დასჭირდა, რადგან ბარსელონადან გადმოსვლა კოვიდის პერიოდში მისთვის რთული აღმოჩნდა. მეორე სეზონში არგენტინელი გაცილებით უკეთ ათამაშდა.
პოჩეტინომ ასევე განმარტა ტაქტიკური ჩანაფიქრი:
არ გვეყო დრო, რომ ამ სამი დასაყრდენის — ნეიმარის, მბაპესა და მესის ირგვლივ მყარი გუნდური სტრუქტურა შეგვექმნა. თუ გსურს ამ სამ თავდამსხმელთან ერთად ითამაშო, უნდა მოიფიქრო სისტემა, რომელიც მათ ზურგს გაუმაგრებს და საშუალებას მისცემს საყვარელ პოზიციებზე მაქსიმუმი აჩვენონ. ჩვენი იდეა იყო დაცვითი სტრუქტურის გაძლიერება, რათა ამ სამეულს მთელი ყურადღება კრეატივზე გადაეტანა.
