პრემიერ ლიგამ თებერვლის თვის საუკეთესო მწვრთნელის ნომინანტები დაასახელა.
პრესტიჟული ჯილდოსთვის კიტ ენდრიუსი, მაიკლ კერიკი, პეპ გვარდიოლა და არნე სლოტი იბრძოლებენ.
კიტ ენდრიუსი (ბრენტფორდი): მისი ხელმძღვანელობით გუნდმა თებერვალში ჩატარებულ ხუთ მატჩში 10 ქულა დააგროვა (3 მოგება, 1 ფრე, 1 მარცხი).
მაიკლ კერიკი (მანჩესტერ იუნაიტედი): „წითელმა ეშმაკებმა“ თებერვალი დაუმარცხებლად განვლეს — ოთხ მატჩში სამი გამარჯვება და ერთი ფრე მოიპოვეს.
პეპ გვარდიოლა (მანჩესტერ სიტი): ესპანელი სპეციალისტის გუნდმა თვე წაუგებლად დაასრულა, ხუთ შეხვედრაში ოთხი მოგება და ერთი ფრე ჩაიწერა აქტივში.
არნე სლოტი (ლივერპული): მერსისაიდელებმა თებერვალში ოთხი მატჩი გამართეს, საიდანაც სამი მოიგეს და მხოლოდ ერთხელ დამარცხდნენ.
გამარჯვებულის ვინაობა გულშემატკივრებისა და საფეხბურთო ექსპერტების გამოკითხვის შედეგად გაირკვევა.
