პსჟ-ს შემტევმა ტრიომ - ხვიჩა კვარაცხელიამ, დეზირე დუემ და უსმან დემბელემ - ნანტთან 3:0 მოგებულ მატჩში გადამწყვეტი როლი ითამაშა. მათ სამივე გოლის შექმნაში მიიღეს მონაწილეობა. ეს გამარჯვება მოჰყვა ლიონთან სამი დღის წინ განცდილ მარცხს (1:2).
L'Équipe-ის თანახმად, ლუის ენრიკე მოსალოდნელი სირთულეების შესახებ აფრთხილებდა გუნდს, თუმცა პსჟ-მ მეტოქეს აშკარად აჯობა. ამ მოგებით, ჩემპიონატის დასრულებამდე ხუთი ტურით ადრე, პსჟ-მ ლანსთან 4-ქულიანი უპირატესობა აღადგინა. მარკინიოსმა გუნდს ფოკუსირებისკენ მოუწოდა და აღნიშნა, თუ რამდენად სწრაფად შეიძლება შეიცვალოს ყველაფერი.
ენრიკემ მოგვიანებით მატჩს თითქმის სრულყოფილი უწოდა - გუნდმა ტრავმების გარეშე ჩაამთავრა შეხვედრა, სათადარიგო მოთამაშეებმა სათამაშო წუთები მიიღეს, ფაბიან რუისი კი მოედანს დაუბრუნდა. შეტევა ისეთი გამართული ჩანდა, როგორც არასდროს მიმდინარე სეზონში.
25 წლის კვარაცხელიამ დუბლი შეასრულა, ბრწყინვალე სოლო რეიდი შემოგვთავაზა და ახლა მის ანგარიშზე მიმდინარე სეზონში 16 გოლია. 2025 წლის იანვარში მოსვლის შემდეგ, ხვიჩა ევროტურნირებზე ბრწყინვალედ ასპარეზობს და ამჟამად პარიზულ კარიერაში ერთ-ერთ საუკეთესო პერიოდს გადის. ასეთ ფორმაში მყოფ ქართველს მომავალ კვირას იოსიპ სტანიშიჩისთვის დიდი პრობლემების შექმნა შეუძლია.
მიუხედავად 17 თებერვალს მონაკოსთან პლეი-ოფის პირველ მატჩში (3:2) კარგი თამაშისა, 20 წლის დუესთვის 2026 წლის დასაწყისი რთული აღმოჩნდა. ნანტთან მან მეორე გოლი ძლიერი დარტყმით გაიტანა და დემბელესთან შესანიშნავი კომბინაციები გაათამაშა.
28 წლის დემბელე, ოქროს ბურთის მფლობელი, ბოლოდროინდელ ფიტნეს-პრობლემებს უკან იტოვებს. მისი მოძრაობა და პასები პსჟ-ს ბევრად აქტიურს ხდის. უკეთესი დაგვირგვინების შემთხვევაში, მას შეხვედრა რამდენიმე ასისტით უნდა დაესრულებინა. მან ერთი საგოლე გადაცემა კვარაცხელიას გაუკეთა და ჩანს, რომ გასული გაზაფხულის პიკ ფორმას უახლოვდება.
