საფრანგეთის სარაგბო ჩემპიონატის რანგით მეორე დივიზიონის (PRO D2) მე-11 ტურში ქართველმა ლეგიონერებმა შედეგიანი მატჩი ჩაატარეს.
ორიაკმა საკუთარ მოედანზე კოლომიე 43:19 დაამარცხა, გამარჯვებაში კი გადამწყვეტი წვლილი ქართველმა მორაგბეებმა შეიტანეს.
მასპინძლებმა პირველი ტაიმი 17:0 მოიგეს, საიდანაც 15 ქულა სწორედ ქართველი მორაგბეების ანგარიშზე მოდის. ირაკლი მჭედლიძემ ბურთი ორჯერ დაამიწა და დუბლი შეასრულა, ერთი ლელო კი ბასა ხონელიძემ მიითვალა.
აღსანიშნავია, რომ მჭედლიძის აქტივში მიმდინარე სეზონში უკვე 6 ლელოა, ხოლო ბასა ხონელიძემ საფრანგეთის მიმდინარე ჩემპიონატში სადებიუტო ლელოთი გამოიჩინა თავი.