ქართველი მორაგბის შესანიშნავი სტარტი და ადგილი სიმბოლურში

საფრანგეთის სარაგბო ჩემპიონატის მეორე დივიზიონის (PRO D2) პირველ ტურში ბიარიცი დებიუტანტ ნიცას დაუპირისპირდა.

ბიარიცმა, რომლის შემადგენლობაშიც კახაბერ დარბაიძე და გიორგი ნუცუბიძე თამაშობენ, საკუთარ მოედანზე ნიცა დამაჯერებლად, 36:5 დაამარცხა.

ავტორიტეტული სარაგბო გამოცემის, „მიდი ოლიმპიკის“ გადაწყვეტილებით, ტურის სიმბოლურ ნაკრებში კახაბერ დარბაიძეც მოხვდა.

ახალგაზრდა ქართველმა შერკინების ბურჯმა ბიარიცის რიგებში სადებიუტო მატჩი სასტარტო შემადგენლობაში დაიწყო და მოედანზე 52 წუთი გაატარა.

ბიარიცს მეორე ტურის მატჩი დღეს, 4 სექტემბერს, ოიონასთან სტუმრად ექნება.