საფრანგეთის სარაგბო ჩემპიონატის მეორე დივიზიონის (PRO D2) მეორე ტურში ქართველმა მორაგბეებმა თავი შესანიშნავი შედეგიანი მოქმედებებით გამოიჩინეს.
ტრადიციულად ერთ-ერთმა ყველაზე „ქართულმა“ გუნდმა, ორიაკმა საკუთარ მოედანზე დაქსი მიიღო და მეტოქე დიდი ანგარიშით, 65:35 დაამარცხა.
მასპინძელთა ძირითად შემადგენლობაში მატჩი ლაშა ტაბიძემ და თედო აბჟანდაძემ დაიწყეს, ხოლო შეცვლაზე ლუკა ნიორაძე, ალექსანდრე ბურდული, ირაკლი მჭედლიძე და გიორგი ქართველიშვილი ჩაერთნენ.
განსაკუთრებით აღსანიშნავია, რომ ლუკა ნიორაძემ, ირაკლი მჭედლიძემ და თედო აბჟანდაძემ მიმდინარე სეზონში საკუთარი პირველი ლელოები გაიტანეს.
პარალელურად, ოიონამ ბიარიცს უმასპინძლა და 47:25 იმარჯვა. გამარჯვებულთა შემადგენლობაში შესანიშნავი მატჩი ჩაატარა ლუკა მატკავამ, რომელიც მოედანზე შეცვლაზე 49-ე წუთიდან გამოჩნდა. საქართველოს ნაკრების ლიდერმა საკუთარ აქტივში ერთი ლელო, ორი გარდასახვა და ორი ჯარიმა ჩაწერა, ჯამში კი გუნდს 15 ქულა შესძინა.
