ინგლისის ნაკრების ლეგენდარულმა ფეხბურთელმა, ჯონ ბარნსმა, GOAL-თან ექსკლუზიურ ინტერვიუში ბუკაიო საკას ირგვლივ შექმნილ ვითარებაზე ისაუბრა.
ბარნსის განცხადებით, არსენალის ვინგერისთვის 2026 წლის მსოფლიო ჩემპიონატზე „გატანილი გოლების სტატისტიკა“ მეორეხარისხოვანია, ხოლო მისი მთავარი პრობლემა ამჟამად ფიზიკური კონდიციებია.
ჩემპიონობის ეიფორია და აქილევსის მყესის პრობლემა
ბუკაიო საკამ ჩრდილოეთ ლონდონში გიჟური სეზონი ჩაატარა - არსენალთან“ერთად პრემიერ ლიგის ნანატრი ტიტული 22-წლიანი პაუზის შემდეგ მოიგო, თუმცა ჩემპიონთა ლიგის ფინალში პსჟ-სთან პენალტების სერიაში მტკივნეული მარცხი განიცადა.
საკლუბო დონეზე წარმატების მიუხედავად, 24 წლის ვარსკვლავმა მუნდიალზე ტრავმა ჩაიტანა. მას აქილევსის მყესის ძვლის დაზიანება აწუხებს, რის გამოც ხორვატიასთან სასტარტო მატჩში (4:2) მოედანზე მხოლოდ შეცვლაზე შევიდა, მის პოზიციაზე კი ნონი მადუეკემ ითამაშა. საკამ გამოტოვა ნაკრების ბოლო ღია ვარჯიშიც და განასთან მატჩის წინ დარბაზში, ინდივიდუალური პროგრამით ივარჯიშა.
ბარნსის ანალიზი: გუნდურობა ინდივიდუალური ციფრების წინააღმდეგ
კითხვაზე, არის თუ არა საკა კვლავ ინგლისის ნაკრების პირველი არჩევანი მარჯვენა ფლანგზე, ჯონ ბარნსმა უპასუხა:
აქ ფორმაზე საერთოდ არ არის საუბარი, საქმე მხოლოდ მის ჯანმრთელობას ეხება. ვინაიდან მადუეკე სრულ მზადყოფნაშია, ამ კონკრეტულ მომენტში შესაძლოა ის წინ იყოს. თომას ტუხელმა ზუსტად იცის, რა დონეზე შეუძლია ბუკაიოს თამაში, ამიტომ ყველაფერი მის ფიზიკურ კონდიციებზეა დამოკიდებული
რაც შეეხება კრიტიკას იმის გამო, რომ საკამ გასულ სეზონში მხოლოდ 11 გოლი გაიტანა, ბარნსი მიიჩნევს, რომ ციფრებს მნიშვნელობა არ აქვს:
თუ არსენალმა ლიგა მოიგო, მისი გოლების რაოდენობას რა მნიშვნელობა აქვს? თუ ინგლისი მუნდიალს მოიგებს და ის ერთ გოლსაც არ გაიტანს, ესეც უმნიშვნელო იქნება. ტუხელი ინდივიდუალურ სტატისტიკას არ უყურებს. თუ საკა ან რაშფორდი უფრო მეტს გაიტანენ, ეს ნიშნავს, რომ ჰარი კეინი გაიტანს ნაკლებს. მთავარია გუნდური თამაში - საკამ სივრცეები უნდა შექმნას ჯუდ ბელინგემისა და კეინისთვის, თავად კი შავი სამუშაო შეასრულოს
ტუხელი რისკზე არ მიდის
ტომას ტუხელმა ხორვატიასთან მატჩის შემდეგ დაადასტურა, რომ საკას ჯანმრთელობას მაქსიმალურად გაუფრთხილდებიან, რადგან ინგლისი ჩრდილოეთ ამერიკაში დიდხანს დარჩენას გეგმავს: „ბუკაიო მზად არის და ნაბიჯ-ნაბიჯ უფრო მოუმატებს. ვფიქრობ, ჯგუფის ბოლო მატჩისთვის ის უკვე 100%-ით მწყობრში იქნება“.
სავარაუდოა, რომ ტუხელი არსენალის ვარსკვლავს სასტარტო შემადგენლობაში მხოლოდ შაბათს, პანამასთან მატჩში დააბრუნებს, განასთან სამშაბათის შეხვედრას კი მარჯვენა ფლანგზე კვლავ მადუეკე დაიწყებს.
