მსოფლიოს პირველ ჩოგან კარლოს ალკარასსა და ერთ-ერთ საუკეთესო მწვრთნელ ხუან კარლოს ფერეროს შორის თანამშრომლობის მოულოდნელად დასრულების მიზეზი კონტრაქტის დეტალებზე შეუთანხმებლობაა.
მადრიდული MARCA-ს ინფორმაციით, ფერერომ ახალი ხელშეკრულება მიიღო და, მასზე დასათანხმებლად ან უარის სათქმელად, 48-საათიანი ვადა მისცეს. ვალენსიელი მწვრთნელისთვის რამდენიმე ახალი პუნქტი არასასურველი აღმოჩნდა.
საგულისხმოა, რომ ხელფასის მნიშვნელოვნად შემცირება მთავარი შემაფერხებელი ფაქტორი არ ყოფილა და ფერეროსთვის მიუღებელი იყო ის გარკვეული ასპექტები, რომლებიც ჩოგბურთთან პირდაპირ დაკავშირებული არაა.
საბოლოოდ, მხარეებმა 2018 წლიდან დაწყებული თანამშრომლობის დასრულების შესახებ ოთხშაბათს გამოაცხადეს.
ფერერო ალკარასს მისი პროფესიონალური კარიერის დასაწყისიდან წვრთნიდა - კარლიტოსმა 24 ტიტული მოიგო, მათ შორის დიდი სლემის 6 ტურნირი (როლან გაროსი, უიმბლდონი და ამერიკის ღია პირველობა - ყველა მათგანი 2-2-ჯერ).
22 წლის ესპანელს 5-დან 9 წლამდე კარლოს სანტოსი წვრთნიდა, 9-დან 17 წლამდე კი - კიკო ნავარო.
