საქართველოს ლიგა 3-ში მე-19 ტურის მატჩები დასრულდა.
დაუმარცხებელ სვლას აგრძელებს ლიდერი თბილისი 2025, რომელმაც ერთ-ერთ აუტსაიდერ ივერია ხაშურს შინ 5:0 მოუგო. გურამ ლუკავამ ჰეთ-თრიქი შეასრულა, თითო გოლი კი თემურ გაბუნიასა და სოსო გიკაშვილის ანგარიშზეა.
ლიგა 3-ის ეგიდით, ვახტანგ თურმანიძის გაწვრთნილმა თბილისელებმა ბოლო მარცხი გასული წლის 28 ნოემბერს, კოლხეთი ხობთან იწვნიეს, მას შემდეგ კი 20-მატჩიანი წაუგებელი სერია აქვთ - 15 მოგება, 5 ფრე.
ლიდერთან 5-ქულიან დისტანციას ინარჩუნებს გურია ლანჩხუთი - ბეთლემი ქედას სტუმტად ასევე 5:0 აჯობეს. დათა სიჭინავამ დუბლი მიითვალა, დავით მაისაშვილმა, ვანო წილოსანმა და კახა კახაბრიშვილმა კი თითოჯერ გაიტანეს.
ტურის მთავარი მატჩი გაიმართა ქობულეთში, სადაც მესამე-მეოთხე ადგილზე მყოფი კონკურენტები - გონიო და იბერია 1999 2 დაუპირისპირდნენ და 2:2 ითამაშეს.
1. თბილისი 2025 (თბილისი) - 47 ქულა;
2. გურია (ლანჩხუთი) - 42 ქულა;
3. იბერია 1999 2 (თბილისი) - 36 ქულა;
4. გონიო (გონიო) - 35 ქულა;
5. ორბი (თბილისი) - 33 ქულა;
6. დიდუბე (თბილისი) - 32 ქულა;
7. მერანი (თბილისი) - 32 ქულა;
8. დინამო თბილისი 2 (თბილისი) - 28 ქულა.
საინტერესო ამბებია ბომბარდირთა დავაში - გურამ ლუკავამ (თბილისი 2025) 16 შედეგიანი დარტყმა მოაგროვა და დათა სიჭინავას (გურია ლანჩხუთი) 1 გოლით გადაასწრო, თორნიკე კერესელიძის (ორბი) ანგარიშზე კი 14 გოლია.
მე-20 ტურის მთავარი შეხვედრა 3 სექტემბერს, ლანჩხუთში, ევგრაფი შევარდნაძეზეა - გურია ერთ-ერთ კონკურენტ გონიოს მასპინძლობს.
ცნობისთვის, ეროვნული ლიგა 2-ში პირდაპირ საუკეთესო 2 გუნდი გადავა, ხოლო მესამე-მეოთხე ადგილზე გასულები ზედა დივიზიონის მეშვიდე-მერვე ადგილზე გასულ გუნდებთან ორრაუნდიან პლეი-ოფს ითამაშებენ და საგზურის მოპოვებას ამ გზით შეეცდებიან.
ფოტო: გურია ლანჩხუთი
