რა უთხრა ლეიკერსის მწვრთნელმა მამუკელაშვილს?

ლოს ანჯელეს ლეიკერსმა გასულ ზაფხულს შემადგენლობა მნიშვნელოვნად გადაახალისა და გუნდის ერთ-ერთი ყველაზე მნიშვნელოვანი ნაბიჯი ტორონტო რეპტორსის ყოფილი კალათბურთელის, სანდრო მამუკელაშვილის 4-წლიანი, 52-მილიონდოლარიანი კონტრაქტით დამატება იყო.

ეს სასტარტო ხუთეულის მოთამაშისთვის დამახასიათებელი ანაზღაურებაა, ამიტომ აშკარაა, რომ ლეიკერსში მამუკელაშვილის შესაძლებლობებს დიდად ენდობიან და მისგან სერიოზულ გავლენას ელიან.

თუმცა, კონკრეტულად რომელ პოზიციაზე ითამაშებს ქართველი კალათბურთელი, ჯერ კიდევ გასარკვევია. ლეიკერსის მთავარი მწვრთნელი ჯეი ჯეი რედიკი მიიჩნევს, რომ მამუკელაშვილის ერთ-ერთი მთავარი უპირატესობა მისი უნივერსალურობაა.

„ტრადიციული მე-5 ნომრის პოზიციაზე სათადარიგო წუთები კევონ ლუნისთან ერთად უნდა გავანაწილოთ. გარკვეული დროის განმავლობაში ამ პოზიციაზე მამუც ითამაშებს.

ვფიქრობ, მამუს დამატება შემადგენლობის სხვადასხვა ვარიანტის გამოყენების საშუალებას გვაძლევს მისი უნარებისა და იმის გამო, თუ როგორი კალათბურთელია. მახსოვს, თავისუფალი აგენტის სტატუსში ყოფნისას მასთან საუბარი გვქონდა.

ზუსტად ვერ ვიხსენებ, როგორ ჩამოაყალიბა კითხვა, მაგრამ დაახლოებით ასეთი რამ მკითხა:

სად მხედავთ შემადგენლობაში? რა პოზიციის მოთამაშედ აღმიქვამთ?

მე ვუთხარი:

ახლა პოზიციებზე საუბარი არ დამაწყებინო. პოზიციები არ მიყვარს, მე შენ უბრალოდ კალათბურთელად გხედავ.

ასე რომ, მხოლოდ მისი არსებობაც კი მნიშვნელოვნად გაზრდის ჩვენს უნივერსალურობას“, - განაცხადა რედიკმა ESPN LA-სთან ინტერვიუში.

შეიძლება ითქვას, რომ ლეიკერსის შემადგენლობაში ორი ყველაზე პრობლემური ადგილი სასტარტო მძიმე ფორვარდისა და სათადარიგო ცენტრის პოზიციებია.

განსაკუთრებით საყურადღებოა ცენტრის პოზიცია, რადგან მამუკელაშვილის გარდა, ერთადერთი სხვა ვარიანტი კევონ ლუნია.

თუ უოკერ კესლერს თამაშების გამოტოვება მოუწევს, ლეიკერსს ფარის დაცვასა და მოხსნებში სერიოზული პრობლემები შეიძლება შეექმნას.

თუ მამუკელაშვილი ცენტრის პოზიციაზე არ ითამაშებს, მას შესაძლოა გარკვეული წუთები მძიმე ფორვარდის პოზიციაზეც მიეცეს.

თუმცა, ჯერჯერობით უცნობია, მოხვდება თუ არა ქართველი კალათბურთელი რედიკის სასტარტო ხუთეულში.

ლეიკერსის მწვრთნელი ხშირად იყენებს დაბალი ხუთეულით თამაშის ტაქტიკას, ხოლო 6 ფუტი და 9 ინჩი (დაახლოებით 206 სმ) სიმაღლის მამუკელაშვილი, რომელსაც პერიმეტრიდან სროლაც შეუძლია, ამ მხრივ გუნდისთვის საკმაოდ საინტერესო ვარიანტი შეიძლება გახდეს.