რა ჟესტით დაუჭირეს მხარი ფანებმა გაბრიელს?

ჩემპიონთა ლიგის ფინალში განცდილი დრამატული მარცხის შემდეგ, არსენალის მცველის, გაბრიელის მაისურების გაყიდვები მოულოდნელად 350 პროცენტით გაიზარდა.

ბრაზილიელმა ცენტრალურმა მცველმა შაბათს გამართულ ფინალურ შეხვედრაში გადამწყვეტი პენალტი ააცილა, რის შედეგადაც პარი სენ-ჟერმენი ზედიზედ მეორედ გახდა ჩემპიონთა ლიგის გამარჯვებული.

მიუხედავად ამ იმედგაცრუებისა, გულშემატკივრებმა ფეხბურთელს სრული მხარდაჭერა გამოუცხადეს და მისი მაისურების მასობრივი ყიდვა დაიწყეს. უქმეებზე გაბრიელის გვარი ყველაზე გაყიდვადი გახდა, გარკვეულ მომენტში კი მისმა მაჩვენებელმა ნებისმიერი სხვა მოთამაშის გაყიდვებს ორჯერ გადააჭარბა.

ფინალში პენალტი ასევე ააცილა ებერეჩი ეზემაც, რომელიც გუნდს გასულ ზაფხულს შეუერთდა. მატჩის შემდეგ დეკლან რაისმა TNT Sports-თან საუბრისას ორივე თანაგუნდელი დაიცვა და აღნიშნა, რომ მათი დამსახურების გარეშე გუნდი პრემიერ ლიგას ვერ მოიგებდა.

გაბრიელმა სოციალურ ქსელში გამოქვეყნებულ განცხადებაში მარცხს მტკივნეული უწოდა, თუმცა დასძინა, რომ ამაყობს გუნდით და მადლობა გადაუხადა ფანებს, რომლებმაც კვირას ლონდონის ქუჩებში გამართულ საჩემპიონო აღლუმზე გრანდიოზული ზეიმი მოაწყვეს.

კლუბის შეფასებით, პრემიერ ლიგის ტიტულის აღსანიშნავ მსვლელობას 750 ათასიდან ერთ მილიონამდე ადამიანი დაესწრო.