მადრიდის რეალის პრეზიდენტმა, ფლორენტინო პერესმა, კლუბის კრიტიკოსებს მკაცრად უპასუხა და მათ განცხადებებს აბსურდული უწოდა.
ეს გამოხმაურება საზოგადოებაში გაჩენილ აზრს მოჰყვა, რომ დედაქალაქური გრანდის მიმართ ყოველწლიურად ზედმეტად არარეალისტური მოლოდინებია დაწესებული.
გასული 2025/26 წლების სეზონი რეალისთვის საკმაოდ არასტაბილური და წარუმატებელი აღმოჩნდა. გუნდმა, რომელსაც სეზონის განმავლობაში ჯერ ჩაბი ალონსო, ხოლო შემდგომ ალვარო არბელოა წვრთნიდნენ, ვერც მოედანზე და ვერც მის ფარგლებს გარეთ ერთიანობის მიღწევა ვერ შეძლო.
ეს ყველაფერი ლოგიკურად შედეგებზეც აისახა და გუნდმა ზედიზედ მეორე უტიტულო სეზონი დაასრულა, რაც მადრიდული გრანდისთვის სრულიად მიუღებელ ფაქტად ჩაითვალა. გულშემატკივრებისა და მედიის რეაქცია იმდენად დაუნდობელი აღმოჩნდა, რომ ცვლილებებს როგორც მმართველ საბჭოში, ისე შემადგენლობაშიც ითხოვდნენ.
მიუხედავად ამისა, ფლორენტინო პერესი მიიჩნევს, რომ კლუბის მიმართ გამოთქმული კრიტიკა ყოველგვარ საზღვრებს გასცდა და რეალობას მოწყვეტილია. მედიასთან საუბრისას პრეზიდენტმა აღნიშნა, რომ ჭკუიდან არ უნდა გადავიდნენ, რადგან იდეა, თითქოს ჩემპიონთა ლიგის მოგება ყოველ წელს არის შესაძლებელი, უბრალოდ სასაცილოა.
მან დასძინა, რომ 10 წელიწადში 6 ჩემპიონთა ლიგის მოგება ისეთი მიღწევაა, რაც მანამდე საფეხბურთო ისტორიაში არავის გაუკეთებია.
