14 ნოემბერს, აბუ-დაბიში, ეტიჰად არენაზე ამერიკული საჭიდაო ორგანიზაციის, RAF Abu Dhabi-ის გრანდიოზული ღონისძიება გაიმართება, სადაც ქართველი გულშემატკივრისთვის დაუჯერებელი სიურპრიზი მომზადდა.
ორგანიზაციამ ოფიციალურად დაადასტურა, რომ ქარდს კიდევ ერთი ქართველი - საბა ლაზიშვილი დაემატა, რომელიც ლეგენდარულ ურაია ფეიბერს დაუპირისპირდება. აღსანიშნავია, რომ საბა თავდაპირველად ამ ღონისძიებაში მონაწილეობას საერთოდ არ იღებდა. მისი დამატება პირდაპირ უკავშირდება იმ გახმაურებულ ინციდენტს, როდესაც 21 წლის ქართველმა მერაბ დვალიშვილი ნურმაგომედოვების კლანის თავდასხმისგან გმირულად დაიცვა. ფეიბერს თავდაპირველად უსმანის ძმა, უმარ ნურმაგომედოვი უნდა შეხვედროდა, თუმცა საბოლოოდ ქარდზე ის სწორედ საბა ლაზიშვილმა ჩაანაცვლა.
ამ ვაჟკაცობამ საბა ინტერნეტის სენსაციად აქცია, ორგანიზატორებმა კი მომენტი ხელიდან არ გაუშვეს და სოციალურ ქსელში ოფიციალურად გამოაცხადეს: ახალი პრეტენდენტი გამოჩნდა.
რაც შეეხება თავად მერაბ დვალიშვილს, ის ბრაზილიელ მარლონ მორაესს შეხვდება. შეგახსენებთ, რომ UFC-ში მათი 2021 წლის დაპირისპირება მერაბის საოცარი ქამბექითა და გამარჯვებით დასრულდა. ახლა კი ისინი ერთმანეთს საჭიდაო ლეიბზე კიდევ ერთხელ გამოცდიან.
ამასთან ერთად, ღონისძიებაზე შედგება გიგა ჭიკაძის დებიუტიც. ქართველი ნინძა რუს ზაბიტ მაგომედშარიპოვს დაუპირისპირდება, რაც საბრძოლო ხელოვნებების ფანებისთვის წლების განმავლობაში ერთ-ერთი ყველაზე ნანატრი შეხვედრა იყო.
