უმარ ნურმაგომედოვის მიერ თვეების წინ ნათქვამი სიტყვები მასვე ცუდად შემოუბრუნდა.
ყოფილი სატიტულო პრეტენდენტი ჩინეთში მეორე საჩემპიონო შანსის მოსაპოვებლად ჩავიდა მას შემდეგ, რაც 19 თვის წინ მერაბ დვალიშვილთან დამარცხდა. თუმცა, შანხაის ტურნირის მთავარ ბრძოლაში დაღესტნელი სონგ იადონგთან უმძიმეს ნოკაუტში ჩავარდა.
ეს შედეგი MMA-ის სამყაროსთვის დიდი სიურპრიზი აღმოჩნდა. თუ გავითვალისწინებთ იმას, რასაც უმარი ორი თვის წინ ამბობდა, ის ოქტაგონზე „მარტივ“ საღამოს ელოდა.
მერაბ დვალიშვილთან მარცხის შემდეგ „ახალგაზრდა არწივმა“ მარიო ბაუტისტასა და დეივესონ ფიგეირედოს დამარცხება შეძლო. ზაფხულში დავიდ მარტინესთან ჩაშლილი ბრძოლის შემდეგ კი ჩინეთში სონგ იადონგთან დაპირისპირება დაიგეგმა.
ბრძოლის ოფიციალურად ჩანიშვნამდე, ნურმაგომედოვმა მეტოქის შანსები საკმაოდ დამცინავად შეაფასა. ივნისში, ადამ ზუბაირაევთან ინტერვიუს დროს, უმარმა ჩინელ მებრძოლს „დასარტყამი ტომარა“ უწოდა. მისი თქმით, იადონგს მხოლოდ ერთი ძლიერი დარტყმა აქვს და ტოპ-კლასის მებრძოლად არ მიიჩნევს. დაღესტნელმა აღნიშნა, რომ ეს მისთვის მარტივი ბრძოლა იქნებოდა და მეტოქის არსენალი საკმაოდ სუსტი ეჩვენებოდა.
საგულისხმოა, რომ უშუალოდ ბრძოლის კვირაში, მაიკ ბონთან ინტერვიუს დროს, ნურმაგომედოვმა გავრცელებული ვიდეოს თარგმანი გააპროტესტა და განაცხადა, რომ მეტოქის მისამართით მსგავსი სიტყვები არ გამოუყენებია. მიუხედავად ამისა, ჩინეთში განცდილმა სასტიკმა ნოკაუტმა მისი საჩემპიონო ამბიციები ამ ეტაპზე მნიშვნელოვნად შეაფერხა.
მის ანგარიშზე ბოლო ოთხ ბრძოლაში უკვე ორი მარცხია = მერაბ დვალიშვილთან და სონგ იადონგთან.
