ინტერ მაიამის ვარსკვლავმა და გაეროს ბავშვთა ფონდის (UNICEF) კეთილი ნების ელჩმა, ლიონელ მესიმ საქველმოქმედო მიზნებისთვის 2.6 მილიონი ევრო გაიღო.
ფრანგული გამოცემა Foot Mercato-ს ცნობით, არგენტინელის ეს უდიდესი ფინანსური დახმარება ქალაქ ბარსელონაში ბავშვთა ონკოლოგიური საავადმყოფოს უზარმაზარი კომპლექსის მშენებლობას მოხმარდება.
თანხა ბარსელონაში მდებარე Sant Joan de Déu-ს ცენტრს გადაერიცხა. ახალი ჰოსპიტალი წელიწადში მინიმუმ 400 პაციენტს მიიღებს და ონკოლოგიური დიაგნოზის მქონე ბავშვებს სრულყოფილ მკურნალობას ერთ სივრცეში შესთავაზებს.
ეს ჟესტი მესის სახელთან დაკავშირებული იმ მრავალრიცხოვანი საქველმოქმედო აქტივობების გაგრძელებაა, რომლებიც ჯანდაცვის, განათლებისა და სპორტის სფეროებს მოიცავს. მესის ფონდის ოფიციალური ვებგვერდის მონაცემებით, ფეხბურთელს არაერთი მნიშვნელოვანი პროექტი აქვს დაფინანსებული. მათ შორისაა: ბავშვთა ლეიკემიის კვლევების ხელშეწყობა, არგენტინაში, მის მშობლიურ ქალაქ როსარიოში მდებარე ჰოსპიტლისთვის სამედიცინო აპარატურის გადაცემა და მოზამბიკში ბავშვთა არასრულფასოვანი კვების წინააღმდეგ ბრძოლის პროგრამის მხარდაჭერა.
არგენტინელი ფეხბურთელი საკუთარ გავლენასა და პოპულარობას ჰუმანიტარული მიზნებისთვის კვლავ აქტიურად იყენებს, განსაკუთრებულ აქცენტს კი ბავშვთა ჯანმრთელობასა და კეთილდღეობაზე აკეთებს.
