რატომ არ აღნიშნა აიარიმ გოლი?

ბრაიტონის ვარსკვლავმა, იასინ აიარიმ მსოფლიო ჩემპიონატის სადებიუტო მატჩში ტუნისის 5-1 განადგურებაში უდიდესი როლი ითამაშა, თუმცა პირველი გოლის გატანის შემდეგ მან აღნიშვნაზე უარი თქვა.

22 წლის ფეხბურთელმა მატჩის მე-7 წუთზე, ესტადიო მონტერეიზე, ვიქტორ გიოკერეშის დაბლოკილი დარტყმის შემდეგ ბურთი მახვილი კუთხიდან ზუსტად გაგზავნა ტუნისის ნაკრების მეკარის, აბდელმუჰიბ შამახის კარში.

მიუხედავად იმისა, რომ მსოფლიო ჩემპიონატზე ასეთი საოცარი დებიუტი ჰქონდა, ახალგაზრდა ნახევარმცველს გოლი არ აღუნიშნავს – მან ხელები მაღლა ასწია და მეტოქე გუნდის გულშემატკივრებს სიმბოლურად ბოდიში მოუხადა.

აიარიმ ეს გადაწყვეტილება საკუთარი წარმომავლობის გამო მიიღო. ის შვედეთის ქალაქ სოლნაში დაიბადა, თუმცა მამამისი, აზუზ აიარი, წარმოშობით ტუნისელია. იასინი შვედეთის ახალგაზრდულ ნაკრებებში თამაშობდა, 2022 წლის მსოფლიო ჩემპიონატის წინ მას ტუნისის ეროვნულ გუნდში თამაში შესთავაზეს, რაზეც ფეხბურთელმა უარი თქვა.

როდესაც მამამისს შვილის ამ არჩევანზე ჰკითხეს, მან შვედურ გამოცემა Aftonbladet-თან განაცხადა, რომ სრულად უჭერდა მხარს ამ გადაწყვეტილებას:

არა, მე მინდოდა, რომ მას შვედეთის ნაკრებში ეთამაშა. მან უნდა იგრძნოს, რომ ვალს უბრუნებს იმ ქვეყანას, რომელიც მასზე ზრუნავდა.

თავად იასინმა კი თქვა:

მე შვედეთში დავიბადე, თავს შვედად ვგრძნობ და ეს ის ქვეყანაა, რომლის წარდგენაც მინდა.

აიარი ბრაიტონს 2023 წელს შეუერთდა და იმავე წელს შვედეთის ეროვნულ ნაკრებში მისი დებიუტიც შედგა. შაბათს გამართულ პრესკონფერენციაზე ტუნისის ნაკრების მწვრთნელმა, საბრი ლამუშიმაც გამოხატა მხარდაჭერა ფეხბურთელის მიმართ:

მე ვიცნობ მას და მის ძმას. მან არჩევანი გააკეთა, რასაც დიდ პატივს ვცემ, ის ძალიან კარგი მოთამაშეა. მატჩის შემდეგ მას წარმატებებს ვუსურვებ, მაგრამ მხოლოდ მატჩის შემდეგ.

შეხვედრის ბოლო წამებზე აიარიმ შორეული დარტყმით მეორე გოლიც გაიტანა. ამჯერად მან გოლი ბევრად ემოციურად აღნიშნა – მუხლებზე გასრიალდა და შვედი გულშემატკივრების წინაშე ყურზე ხელი მიიტანა.