საქართველოს ნაკრებისთვის უკრაინასთან გამარჯვება არა მხოლოდ ერთა ლიგის მიმდინარე გათამაშების, არამედ სამომავლო პერსპექტივების თვალსაზრისითაც მნიშვნელოვანია.
1. B დივიზიონში ადგილის შენარჩუნება
გამარჯვების შემთხვევაში საქართველო ჯგუფში მესამე ადგილს დაიკავებს და B დივიზიონში დარჩება. შესაბამისად, 2027 წლის მარტში C დივიზიონის მეორეადგილოსანთან პლეი-ოფის გამართვა აღარ მოუწევს.
2. EURO 2028-ის შესარჩევი ეტაპი
მესამე ადგილი საქართველოს ხუთგუნდიან საკვალიფიკაციო ჯგუფში მოხვედრის წინაპირობას შეუქმნის, სადაც, სავარაუდოდ, მინიმუმ ორი შედარებით სუსტი მეტოქე ეყოლება. ეს ევროპის ჩემპიონატზე გასვლისთვის ბრძოლაში მნიშვნელოვანი ფაქტორი შეიძლება აღმოჩნდეს.
3. სამომავლო პერსპექტივა
UEFA-ს მიერ დაანონსებული ცვლილებები, რომლებიც 2028/29 წლების სეზონიდან ამოქმედდება, ერთა ლიგისა და შესარჩევი ტურნირების ახალ მოდელს ითვალისწინებს. შესაბამისად, B დივიზიონში ადგილის შენარჩუნება საქართველოს სამომავლო შესაძლებლობებისთვისაც მნიშვნელოვანია.
ისტორიული სტატისტიკა: საქართველოს უკრაინა აქამდე ჩატარებულ 12 შეხვედრაში არასდროს დაუმარცხებია - 5 ფრე და 7 მარცხი. რამაზ სვანაძის გუნდს ამ არასასიამოვნო სერიის დასრულების შანსი აქვს.