მადრიდის რეალმა ზამთრის სატრანსფერო ფანჯარა კიდევ ერთხელ ყოველგვარი სიახლის გარეშე დახურა.
მიუხედავად იმისა, რომ გუნდი სერიოზულ საკადრო კრიზისს განიცდის და ტრავმირებული ფეხბურთელების სია საკმაოდ ვრცელია, კლუბის ხელმძღვანელობამ შემადგენლობის გაძლიერებაზე კატეგორიული უარი თქვა. მადრიდში მიიჩნევენ, რომ არსებული რესურსი სრულიად საკმარისია ლა ლიგასა და ჩემპიონთა ლიგაზე წარმატებული ასპარეზობისთვის, ამიტომ იანვარში გეგმების შეცვლა საჭიროდ არ ჩათვალეს.
აღსანიშნავია, რომ სამეფო კლუბს იანვრის თვეში ფეხბურთელი უკვე შვიდი წელია არ დაუმატებია — ბოლო ასეთი ტრანსფერი ბრაჰიმ დიასი იყო (მან სიტიდან) 17 მილიონ ევროდ. კლუბის პოლიტიკაზე გავლენა ვერც ბოლოდროინდელმა წარუმატებლობებმა მოახდინა; ესპანეთის სუპერთასზე მარცხის და თასიდან ნაადრევი გამოვარდნის მიუხედავად, ბორდს ახალი მოთამაშეების დამატების საკითხი არც კი განუხილავს.
პირიქით, რეალი უფრო მეტად შემადგენლობის შემცირებაზე იყო ორიენტირებული, ვიდრე მის გაფართოებაზე. ერთადერთი შესაძლო ნაბიჯი ფრან გარსიას ბორნმუთში გადასვლა იყო, თუმცა კლუბმა ეს ტრანსფერი ბოლო მომენტში დაბლოკა. გარდა ამისა, გუნდი სეზონის ბოლომდე იჯარით ენდრიკმა დატოვა.
ახალი სახეების ნაცვლად, მადრიდელებმა აქცენტი შიდა სტრუქტურის მოწესრიგებაზე გააკეთეს. გუნდის სამედიცინო შტაბში ნიკო მიჰიჩი დაბრუნდა, ფეხბურთელების ფიზიკურ მომზადებაზე კი სრული კონტროლი ანტონიო პინტუსმა აიღო. კლუბში სჯერათ, რომ პრობლემა არა ფეხბურთელების ნაკლებობაში, არამედ სამედიცინო და ფიზიკურ მომზადებაში იყო, რის გამოსწორებასაც ახლა შიდა რესურსებით ცდილობენ.
